Kokain istifadəçisi olduğunu etiraf edən almaniyalı deputat qarşıdakı parlament seçkilərində namizədlikdən imtina edib
Berlin, 3 dekabr, AZƏRTAC
Almaniya Bundestaqının Sosial Demokrat Partiyadan (SPD) olan üzvü Manuel Qava kokaindən istifadə etdiyini etiraf etdikdən sonra qarşıdan gələn parlament seçkilərində namizədliyini geri götürdüyünü bildirib.
AZƏRTAC “Spiegel”ə istinadla xəbər verir ki, 33 yaşlı deputat bu barədə “Neue Osnabrücker Zeitung” qəzetinə müsahibəsində məlumat verib.
M.Qavanın bu etirafı onun narkotikdən istifadə etməsinə dair dəlillərin “Neue Osnabrücker Zeitung” və “Tagesspiegel” qəzetlərindəki araşdırmalar nəticəsində ortaya çıxmasından sonra baş verib.
O, Bundestaqın deputatı və ictimai xadim olması ilə əlaqədar yaranan stressə dözə bilmədiyi üçün bir neçə ay ərzində kokaindən istifadə etdiyini bildirib. M.Qava yenidən namizəd olmaması ilə bağlı qərarını xəstəliklə əlaqələndirsə də, “Neue Osnabrücker Zeitung” və “Tagesspiegel” qəzetləri onun bu barədə hər hansı sübut təqdim etmədiyini yazıb.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
