Konqoda 246 nəfərin ebola virusuna yoluxduğu ehtimal edilir
Qahirə, 15 may, AZƏRTAC
Konqo Demokratik Respublikasının İturi vilayətində ebola virusu yenidən yayılıb.
AZƏRTAC xəbər verir ki, bu barədə Afrika Xəstəliklərə Nəzarət və Profilaktika Mərkəzi məlumat yayıb.
Bildirilib ki, qurum vəziyyətlə əlaqədar Konqo Demokratik Respublikası, Uqanda, Cənubi Sudan və beynəlxalq tərəfdaşlarla transsərhəd nəzarət, hazırlıq və cavab tədbirlərinin gücləndirilməsi məqsədilə təcili iclas keçirəcək.
Məlumata görə, indiyədək virusa yoluxduğu ehtimal edilən 246 nəfər qeydə alınıb, 65 ölüm halı baş verib. Yoluxma və ölüm hallarının əksəriyyəti Monqvalo və Ruambara səhiyyə zonalarında müşahidə olunub.
Qeyd olunub ki, Bunia və Ruambara şəhərlərində əhali sıxlığı, eləcə də Monqvaloda mədən fəaliyyəti ilə bağlı miqrasiya səbəbindən xəstəliyin daha geniş yayılması riski narahatlıq doğurur.
Bildirilib ki, virus yoluxmuş şəxslərin bədən mayelərinə toxunmaq, çirklənmiş əşyalar və ya xəstəlik səbəbindən vəfat etmiş insanlarla birbaşa təmas nəticəsində yayılır. Son 50 ildə ebola virusu Afrikada 15 mindən çox insanın həyatına son qoyub.
Xatırladaq ki, Konqo Milli İctimai Səhiyyə İnstitutunun direktoru Dyedonne Mvamba Kazadi ötən ilin dekabrında Konqo Demokratik Respublikasında ebola epidemiyasının faktiki olaraq başa çatdığını elan etmişdi.
Bölmənin digər xəbərləri
