Bakı, 7 dekabr, AZƏRTAC

“Könüllülər ili” çərçivəsində Azərbaycan Respublikası Gənclər Fondunun maliyyə dəstəyi və “Vətəndaş Cəmiyyətində Debat” İctimai Birliyinin təşkilatçılığı ilə “Parlamentdə könüllülük” debat forumu həyata keçirilir.

Gənclər Fondundan AZƏRTAC-a bildiriblər ki, layihənin məqsədi gənclərin natiqlik, araşdırma və auditoriya qarşısında nitq bacarıqlarının inkişaf etdirilməsi, parlament debatı formatının öyrənilməsi, könüllülük fəaliyyətinə dair məlumatlandırılması və onların bu sahədə qanun layihəsinə təkliflər hazırlamalarına şərait yaradılmasıdır.

Layihədə 70-dən çox gəncin iştirakı nəzərdə tutulub. Debat forumu çərçivəsində “ZOOM” platforması vasitəsilə onlayn təlimlər, məlumatlandırıcı görüşlər, debat turniri baş tutacaq. Fərqlənən iştirakçılar təltif olunacaqlar.

Layihənin tərəfdaşları gənclər üçün müxtəlif imkanları özündə cəmləşdirən "GəncApp" mobil tətbiqi və gənclər arasında intellektual debat ənənələrini inkişaf etdirən Milli Debat Proqramıdır.

“Vətəndaş Cəmiyyətində Debat” İctimai Birliyi tərəfindən Azərbaycanda ilk dəfə olaraq virtual debatlar həyata keçirilib. Üç ay ərzində təşkil olunan “I Respublika Virtual Debat Çempionatı”nda 30-dan çox şəhər və rayonu təmsil edən 500-dən çox gənc iştirak edib və aktual mövzularda 100-dən çox debat oyunu keçirilib.