KÜR BOYU ƏRAZİDƏ XİLASETMƏ TƏDBİRLƏRİ DAVAM ETDİRİLİR
Sabirabad, 14 may (AZƏRTAC). Son onilliklər ərzində Kür çayında gursululuq pik həddə çatmışdır. “Meliorasiya və Su Təsərrüfatı” Açıq Səhmdar Cəmiyyətinin (ASC) sədri Əhməd Əhmədzadə kütləvi informasiya vasitələri əməkdaşlarına bildirmişdir ki, indi çayda saniyədə 1.100-1.200 kubmetr su ötürülür. Bu, çayda ən çox gursululuğun qeydə alındığı 2003-cü il səviyyəsindən təxminən 400 kubmetr çoxdur.
Son illər Kürün məcrası təbii proseslər nəticəsində hədsiz dərəcədə lillənmişdir. Biz çayda belə gursululuğu gözləyirdik. Odur ki, bütün diqqətimizi Kür boyu ərazilərdə bəndlərin bərkidilməsinə yönəltmişdik.
ASC sədri demişdir ki, mayın 7-də Şirvan şəhərinin Bayramlı qəsəbəsi istiqamətində Kürün bəndi dağılmış, Sabirabad rayonunun Qaragüney və Dadaşbəyli kəndləri ciddi təhlükə ilə üzləşmişdi. Qısa müddətdə daşqın bu yaşayış məntəqələrindəki 300-dək həyəti basmışdır. Respublika Fövqəladə Hallar Nazirliyinin və rayonun idarə, müəssisə və təşkilatlarının birgə səyi nəticəsində əhali öz əmlakı ilə birlikdə dərhal evakuasiya olunmuşdur. Sonrakı günlərdə rayonun daha 12 kəndinin əhalisi də köçürülərək Şirvan və Sabirabad şəhərlərində qurulmuş çadır şəhərciklərində və qonşu rayonlardakı qohum-əqrabalarının yanında yerləşdirilmişdir. Mayın 12-də gecə Kür çayının Bayramlı qəsəbəsi istiqamətində dağıtdığı bəndin bərpası tam başa çatmışdır. Bu işin görülməsində Fövqaladə Hallar Nazirliyi, Meliorasiya və Su Təsərrüfatı Açıq Səhmdar Cəmiyyəti, Daxili İşlər Nazirliyinin texnikası və canlı qüvvəsi səfərbərliyə alınmışdır. Bəndin bağlanmasına respublikanın, demək olar ki, hər yerindən dəstək gəlmişdir.
Cəmiyyətin sədri bildirmişdir ki, indi Sabirabadın evakuasiya edilmiş 5 kəndinin əhalisinin öz doğma yurd-yuvasına qaytarılması istiqamətində iş aparılır.
Cəmiyyətin rəsmisi jurnalistlərin sorğusuna Saatlı rayonunda “Sarısu” gölü ətrafında yaranmış ekoloji gərginliyə də açıqlama gətirmişdir. O bildirmişdir ki, “Sarısu” gölü ərafındakı Saatlı rayonunun Hacıqasımlı, Dəlilər, Musalı, Nərimankənd və Kamallı kəndlərinin əhalisi ehtiyat tədbiri olaraq qismən köçürülmüşdür. Mayın 13-də gölün mühafizə bəndi sıradan çıxdıqdan sonra daşqın suları yaxınlıqdakı kollektora yönləndirilmişdir. Bu ərazidə Fövqaladə Hallar Nazirliyi, “Meliorasiya və Su Təsərrüfatı” Açıq Səhmdar Cəmiyyəti, eləcə də rayonun idarə, müəssisə və təşkilatlarının 100-dək texnikası, 1000 nəfərədək canlı qüvvəsi xilasetmə tədbirlərinə cəlb olunmuşdur.
Əhməd Əhmədzadə Kürün deltasında lildən təmizlənmə işlərinin xeyli sürətləndirildiyini söyləmişdir. Göstərmişdir ki, sözügedən əraziyə Xəzər Dəniz Gəmiçiliyi İdarəsinin 2 gəmisi gətirilmişdir. Deltanın tezliklə lildən təmizlənməsi daşqın suyunun Xəzərə axıdılmasını xeyli sürətləndirəcəkdir.
Fövqaladə hallar nazirinin müavini Etibar Mirzəyevin bildirdiyinə görə, indi bütün qüvvələr Sabirabad rayonunun Ulacalı icra nümayəndəliyinin Mürsəlli kəndi istiqamətində dağılmış bəndin bərpasına səfərbər olunmuşdur. Demək olar ki, respublikanın hər yerindən bəndi bərkitmək üçün ağır qaya parçaları və beton hissələri daşınmaqdadır. Sözügedən icra nümayəndəliyinin əhatəsində olan Ulacalı, Mürsəlli və Şıxlar kəndlərinin 4 min nəfərədək sakini vaxtında evakuasiya olunmuşdur.
Nazirlik rəsmisinin məlumatına görə, qurumun daşqın zonasında növbə çəkən vertolyotlarının və qayıqlarının köməyilə hər tərəfi su ilə örtülmüş yerlərdə qalan 82 nəfər Sabirabad sakininin həyatı xilas edilmişdir.
Bölmənin digər xəbərləri
