KÜR ÇAYI ŞİRVAN ŞƏHƏRİ ƏRAZİSİNDƏ İKİNCİ MÜHAFİZƏ BƏNDİNİ DƏ YARMIŞDIR [YENİLƏNİB]
Bakı, 7 may (AZƏRTAC). Mayın 7-də səhər Kür çayı Şirvan şəhəri ərazisində ikinci mühafizə bəndini də yarmışdır.
Şəhərin Bayramlı qəsəbəsini, Sabirabad rayonunun Minbaşı, Dadaşbəyli, Qaragüney, Zalqarağac, Moranlı kəndlərini su basmışdır. Daşqının məsafəsi geniş olduğundan suyun qarşısını almaq üçün bəndləri bağlamaq mümkün olmamışdır. Daşqın Sabirabad rayonunun ərazisinə doğru yönəlmişdir.
Baş nazirin müavini Abid Şərifov bildirmişdir ki, 2 gün bundan əvvəl Xudafərindən əlavə olaraq saniyədə 900 kub suyun buraxılması nəticəsində belə bir çətin vəziyyət yaranmışdır. Nəticədə kəndləri su basmışdır.
Görülən təcili tədbirlər təbii fəlakətin miqyasının böyüməsinə imkan verməmışdır. Prezident İlham Əliyevin göstərişi ilə nazirlik və idarələrin rəhbərləri təbii fəlakət zonalarına ezam olunmuşlar. Əhali təhlükəli ərazilərdən köçürülür. Daşqının qarşısının alınması üçün xeyli canlı qüvvə və texnika cəlb olunmuşdur.
Şirvan və Sabirabaddakı vəziyyətlə bağlı operativ qərargah yaradılmışdır. Qərargaha fövqəladə hallar nazirinin müavini O.Hacıyev rəhbərlik edir.
Hazırda yüzlərlə texnika daşqının qarşısının alınmasına cəlb edilmişdir.
Fövqəladə hallar naziri Kəmaləddin Heydərov bildirmişdir ki, ölkə Prezidentinin tapşırığından sonra bütün qurumlar birgə fəaliyyət göstərirlər. FHN-in texnikasının böyük qismi, 1500 nəfərdən artıq şəxsi heyət və 3 vertolyot hadisə yerinə cəlb olunmuşdur. Fövqəladə Hallar Nazirliyinin Dövlət Sularda Xilasetmə Xidmətinin 46 xilasedicisi 12 rezin lotka ilə su basmış ərazilərdə polislə birgə xilasetmə işləri aparır.
Əhali və mal-qara fəlakət zonasından çıxarılır. İtki yoxdur.
Təhlükənin qarşısını almaq üçün Şirvan-Sabirabad magistral yolu da bağlanmışdır. Dövlət qurumlarının bütün rəhbərləri hadisə ilə bağlı rayonlara ezam olunmuşlar. Bütün məsələlər ciddi nəzarət altındadır. Təhlükəni sovuşdurmaq üçün on minlərlə yerli əhali də köməyə qoşulmuşdur. Vəziyyət barədə anbaan Azərbaycan Prezidentinə məlumat verilir. Dövlət başçısının tapşırığı ilə əhali təhlükəli yerlərdən köçürülür və onlar üçün yeni ərazilərdə bütün şərait yaradılır. Əhalinin köçürülməsi və yerləşdirmə işləri indi də davam edir.
Bölmənin digər xəbərləri
