Laçın sakini: Prezidentimizin Qərbi Azərbaycanla bağlı dedikləri də reallığa çevriləcək
Ağcabədi, 2 yanvar, Tahir Ağaməmmədov, AZƏRTAC
Biz laçınlılar Prezident İlham Əliyevin 50 illik yubiley günündə Mehriban xanım Əliyeva ilə birlikdə, Ağcabədi rayonu Taxtakörpü ərazisində laçınlı məcburi köçkünlər üçün tikilmiş 552 ailəlik qəsəbənin açılışı zamanı keçirdiyi görüşü ən əziz xatirə kimi məmnunluq hissi ilə xatırlayırıq. Görüşdə dövlət başçısının köçkünlər üçün inşa edilmiş yaşayış məntəqəsinin müvəqqəti olacağını, bütün köçkünlər kimi laçınlıların da tezliklə ata-baba yurdlarına qayıdacağını qətiyyətlə bildirməsi hər birimizdə möhkəm inam hissi yaratmışdı. Sevindirici haldır ki, biz Prezidentimizin sözünün də imzası qədər önəmli olduğunun bir daha şahidiyik. İndi Laçın düşmən tapdağından azaddır.
Bu sözləri AZƏRTAC-ın bölgə müxbirinə 2011-ci il dekabrın 24-də Prezident İlham Əliyevin laçınlılarla keçirtdiyi görüşün iştirakçısı Osman Həsənov deyib.
O.Həsənov bildirib ki, laçınlılar həmişə torpaqlarımızın işğaldan azad ediləcəyinə inanıblar. “Biz əmin idik ki, Prezidentimiz bizi doğma yurdumuza qaytaracaq. Belə də oldu. 2020-ci il sentyabrın 27-də başlayan Qarabağ uğrunda gedən haqq savaşımız Prezident İlham Əliyevin uğurlu daxili və xarici siyasəti, diplomatik bilik və bacarığı, eləcə də rəşadətli ordumuzun qəhrəmanlığı sayəsində Zəfərlə başa çatdı. Erməni işğalçıları üzərində birliyimizin təntənəsi olan bu möhtəşəm Qələbə dövlət başçısı İlham Əliyevin əzmkarlığı, dönməz siyasi iradəsi, erməni havadarlarının bütün təzyiqlərinə mərdi-mərdanə sinə gərərək onların hamısını dəf etməsi sayəsində reallığa çevrildi. Bu gün biz qürurluyuq! Qürurluyuq ona görə ki, Prezident İlham Əliyevin qətiyyəti və cəsarəti sayəsində 30 illik həsrətə son qoyularaq müqəddəs torpaqlarımız azad edilib. Bu gün işğaldan azad edilmiş bütün ərazilərimizdə, o cümlədən Laçınımızda üçrəngli bayrağımız dalğalanır. Artıq Zəngilan rayonunun Ağalı kəndindən başlayaraq işğaldan azad edilmiş ərazilərə Böyük Qayıdışa start verilməsi, həmçinin köçkünlərin tezliklə Laçın şəhərinə, rayonun Zabux və Sus kəndlərinə qayıdışına hazırlıqla bağlı sürətli quruculuq və bərpa işlərinin görülməsi bizi həddindən çox sevindirir”.
Laçın sakini Prezident İlham Əliyevin dekabrın 24-də Qərbi Azərbaycandan olan ziyalılarla görüşündən bəhs edərək deyib: “Dekabrın 24-də Qərbi Azərbaycan İcmasının inzibati binasında Qərbi Azərbaycandan olan bir qrup ziyalı ilə görüşü zamanı Prezident İlham Əliyevin “Gün gələcək və Qərbi Azərbaycandan olan soydaşlarımız, onların yaxınları, uşaqları, nəvələri tarixi diyarımız olan Qərbi Azərbaycana qayıdacaqlar”, - deməsi heç də təsadüfi deyil. Daim öz sözünün sahibi olan dövlət başçısının bu çıxışının da reallaşacağına qəti əminik. Biz bunu öz timsalımızda görürük. İnanırıq ki, Prezidentimizin 2011-ci ildə biz laçınlılara dediyi sözlər gerçəkləşdiyi kimi, Qərbi Azərbaycanla bağlı dedikləri də reallığa çevriləcək”.
Bölmənin digər xəbərləri
