Laçın, 27 sentyabr, Aydın Yavərzadə, AZƏRTAC

Laçın şəhərində 27 Sentyabr - Anım Gününün ildönümü ilə bağlı tədbir təşkil edilib. Tədbirdə şəhid ailələri, qazilər, hərbçilər, yerli sakinlər, Laçın rayonunda Azərbaycan Respublikası Prezidentinin xüsusi nümayəndəliyi, Laçın rayonunda Bərpa, Tikinti və İdarəetmə Xidmətinin və “Laçın Abadlıq Xidməti” ASC-nin əməkdaşları iştirak ediblər.

AZƏRTAC-ın bölgə müxbiri xəbər verir ki, əvvəlcə tədbir iştirakçıları şəhid Camal Quliyevin məzarını ziyarət edərək üzərinə gül dəstələri qoyub, Vətən uğrunda canlarını fəda etmiş şəhidlərin əziz xatirəsini ehtiramla anıblar.

Tədbir Laçın şəhərində yerləşən “LaCinema” Kino Mərkəzində davam edib.

Mərasim Azərbaycan Dövlət Himninin səsləndirilməsi və şəhidlərin xatirəsinin bir dəqiqəlik sükutla yad edilməsi ilə başlayıb.

Əvvəlcə Laçın rayonunda Azərbaycan Respublikası Prezidentinin xüsusi nümayəndəsi Məsim Məmmədov çıxış edib. O qeyd edib ki, 44 günlük Vətən müharibəsində əldə olunan şanlı Zəfərin əsas qaynağı Müzəffər Ali Baş Komandan, ordu və onun ətrafında sıx birləşən məğrur xalqımız olub. Məsim Məmmədov şəhidlərin adlarının və qəhrəmanlıqlarının nəsillər dəyişdikcə yaşayacağını vurğulayıb.

Sonra Milli Qəhrəman Oqtay Güləliyevin həyat yoldaşı Afət Güləliyeva çıxışında qeyd edib ki, Azərbaycanın müstəqilliyi və ərazi bütövlüyü Prezidentin qətiyyətli siyasəti, Vətən uğrunda canlarından keçən şəhidlərimizin qanı-canı hesabına bərpa olunub. O, Azərbaycan Ordusunun şücaətindən danışaraq bildirib ki, bizə Zəfər sevincini bəxş edən xalqımızın qəhrəman övladları heç zaman unudulmayacaq.

“Laçın Abadlıq Xidməti” ASC-nin direktoru Nəsimi Əsədov isə vurğulayıb ki, Vətən uğrunda canlarını fəda edən şəhidlərin şərəfli ömrü gələcək nəsillərin vətənpərvər ruhda tərbiyəsində mühüm rol oynayır.

Rəsmi mərasimdən sonra 44 günlük Vətən müharibəsinə həsr olunmuş və müharibə gerçəklərini əks etdirən sənədli film nümayiş etdirilib.