Layihə rəhbəri: Bakıda təşkil olunan aşpazlıq yarışması beynəlxalq arenalara çıxış imkanıdır
Bakı, 18 iyul, AZƏRTAC
Bakıda təşkil olunan beynəlxalq aşpazlıq yarışması Avropa İttifaqı tərəfindən maliyyələşdirilən və BMT İnkişaf Proqramı tərəfindən həyata keçirilən, “WorldSkills Azerbaijan” İctimai Birliyi və CASA Kulinariya Mərkəzinin dəstəyi ilə reallaşan yarışmadır.
Bunu BMT İnkişaf Proqramının Azərbaycan üzrə layihə rəhbəri Eltəkin Ömərov AZƏRTAC-a müsahibəsində deyib.
Eltəkin Ömərov qeyd edib ki, “WorldSkills” yarışmalarına hazırlıq 2020-ci ildən etibarən başlanılıb: “Bununla da bir ilkə imza atılır. Bakıda keçirilən beynəlxalq yarışmada Azərbaycanla yanaşı, Türkiyə, Qazaxıstan və Özbəkistandan da namizədlər iştirak edirlər. “Silk Way Flavour Fest: Baku Edition” yarışması ölkəmiz üçün müvafiq sahədə beynəlxalq arenalara çıxışdır. Yarışma iyulun 19-dək davam edəcək. İyulun 20-də isə bağlanış mərasimi keçiriləcək və iştirakçılara mükafatlar veriləcək. Milli komandamız sentyabrın 10-15-də isə Fransanın Lion şəhərində keçiriləcək 47-ci beynəlxalq “WorldSkills” yarışlarına göndəriləcək”, - deyə Eltəkin Ömərov fikrini tamamlayıb.
Bölmənin digər xəbərləri
