LAYİHƏYƏ BU İL 568 MİLYON DOLLAR XƏRCLƏNMİŞDİR
Dövlət Neft Şirkətindən (ARDNŞ) AZƏRTAC-a bildirmişlər ki, bu ilin sonunadək “Şahdəniz” yatağından qaz hasilatına başlanması nəzərdə tutulur. 1 trilyon kubmetrdən artıq qaz, 300 milyon ton kondensat ehtiyatına malik bu yataqdan hasil olunacaq təbii qaz Bakı-Tbilisi-Ərzurum (Cənubi Qafqaz) boru kəməri ilə ixrac ediləcəkdir. Artıq kəmərin tikinti işləri başa çatmaq üzrədir. Bu il layihə üzrə tikinti işlərinə 568 milyon ABŞ dolları xərclənmişdir. Layihənn ümumi dəyəri isə 4 milyard dolları keçmişdir. Əvvəlcədən bu rəqəmin 2,9 milyard dollar məbləğində olacağı nəzərdə tutulmuşdur. Layihənin qiymət artımı materialların, digər xərclərin dəyərinin bahalaşması və tikintinin Gürcüstan ərazisində baş vermiş gecikmələrlə əlaqələndirilir. Qeyd edək ki, bu kəmərin işə düşməsi ilə Azərbaycan həm özünün, həm də yaxın qonşu və tərəfdaşları – Türkiyə və Gürcüstanın təbii qaza olan tələbatını ödəyəcəkdir. Qaz kəmərlə Türkiyəyə, oradan isə Avropa bazarlarına çıxarılacaqdır. Artıq Avropanın bir çox dövlətləri – Yunanıstan, İtaliya, Ukrayna, Baltikyanı dövlətlər bu layihəyə maraq göstərirlər.
Bölmənin digər xəbərləri
