LƏNKƏRANDA ÇİMƏRLİK FUTBOLU ÜZRƏ ZONA TURNİRİ BAŞA ÇATMIŞDIR
Lənkəran, 17 avqust (AZƏRTAC). Lənkəran şəhərindəki “Qafqaz” sahil otelinin istirahət zonasında “Cənub” kuboku uğrunda çimərlik futbolu üzrə zona turniri başa çatmışdır.
Azərbaycan Çimərlik Futbol Federasiyası, Azərbaycan Regional Futbol Federasiyası, “Cənub” Regional Futbol Federasiyası, Lənkəran rayon gənclər və idman idarəsinin təşkilatçılığı ilə keçirilən futbol yarışmasında cənub bölgəsinin 9 şəhər və rayonunun 12 komandası mübarizə aparmışdır. Dörd qrupda keçirilən turnir iki gün davam etmişdir.
Yarımfinal oyunlarında “A” qrupunun qalibi Astara şəhərinin “Astara” komandası “D” qrupunun qalibi Lənkəran şəhərinin “Xəzər-92” komandasınə 9:2, Cəlilabad şəhərinin “Cəlilabad” komandası Lənkəran şəhərinin “Kiçik Bazar” komandasına 6:1 hesabı ilə qalib gələrək finala çıxmışlar.
Zona turnirində 3-cü yer uğrunda Lənkəran şəhərinin iki komandası: “Xəzər-92” və “Kiçik Bazar” komandaları qarşılaşmışlar. Daha inamlı oyun nümayiş etdirən “Xəzər-92” komandası 6:0 hesabı ilə qələbə qazanmışdır.
Final görüşünün birinci hissəsində Cəlilabad futbolçuları hesabı açsalar da, astaralı idmançılar bir dəqiqə ərzində rəqibin qapısına cavab topu vuraraq hesabı bərabərləşdirmiş, hissənin sonlarında isə daha iki dəfə fərqlənərək hesabı 3:1-ə çatdırmışlar.
Görüşün ikinci hissəsində astaralı futbolçular 4 fəfə, Cəilabad idmançıları isə 1 dəfə fərqlənmişlər.
Yarışmanın üçüncü hissəsini də inamla keçirən Astara şəhərinin futbolçuları cəlilabadlı idmançılarının qoruduğu qapıdan daha üç top keçirmişlər. “Cəlilabad” komandası isə həlledici hissədə rəqiblərinə yalnız iki topla cavab verə bilmişlər.
Final görüşündə rəqibi üzərində 10:4 hesabı ilə inamlı qələbə qazanan “Astara” komandası zona turnirinin qalibi olmuşdur.
Futbolçuların mükafatlandırılması mərasimində Azərbaycan Regional Futbol Federasiyası İctimai Birliyinin prezidenti, “Şöhrət” ordenli İsgəndər Cavadov, Azərbaycan Çimərlik Futbol Federasiyasının baş katibi Əli Əliyev, Azərbaycan Regional Futbol Federasiyası İctimai Birliyinin vitse-prezidenti, idman ustası Maşallah Əhmədov, “Cənub” Regional Futbol Federasiyasının rəhbəri Sakin Məmmədzadə çıxış edərək, AFFA rəhbərliyi adından qalib komandaların futbolçularını təbrik etmiş, ölkəmizdə bədən tərbiyəsi və idmanın, o cümlədən futbolun inkişafına göstərilən qayğıya görə dövlətimizin başçısına minnətdarlıqlarını bildirmişlər.
Cənub bölgəsində ilk dəfə keçirilən çimərlik futbolu üzrə zona turnirində birinci yeri tutan “Astara” komandasının futbolçularına 500 manat, ikinci yeri tutan “Cəlilabad” komandasına 300 manat, üçüncü yeri tutan “Xəzər-92” komandasının idmançılarına 200 manat pul mükafatı, turnirin kubokları və diplomları təqdim edilmişdir.
Bölmənin digər xəbərləri
