Macarıstanın dünyaşöhrətli yazıçısı Şandor Lejakın kitablarının təqdimatı olub
Naxçıvan, 13 may, AZƏRTAC
Mayın 13-də Naxçıvan Dövlət Universitetində Macarıstan Milli Assambleyasının sədr müavini, dünyaşöhrətli yazıçı Şandor Lejakın kitablarının təqdimatı keçirilib.
Universitetin Media və ictimaiyyətlə əlaqələr şöbəsindən AZƏRTAC-ın bölgə müxbirinə bildirilib ki, Naxçıvan Dövlət Universitetinin rektoru Elbrus İsayev Azərbaycanla Macarıstan arasında bütün sahələrdə qarşılıqlı etimada və dəstəyə əsaslanan yüksəksəviyyəli əlaqələrdən danışıb. O, Şandor Lejakın universitetə gəlişini olduqca əhəmiyyətli və çoxdan gözlənilən əlamətdar hadisə adlandırıb, Macarıstana ötənilki səfərindən söz açıb. Rektor səfər çərçivəsində Şandor Lejakın dəstəyi və təşəbbüsü ilə Con fon Neyman Universiteti ilə NDU arasında ikili diplom müqaviləsinin imzalanmasını xatırladıb və bugünkü görüşdə iştirakına görə təşəkkürünü bildirib. Elbrus İsayev Şandor Lejakın ali təhsil müəssisəsində kitablarının təqdimatının keçirilməsini mühüm hadisə olaraq dəyərləndirib. Yazıçının xüsusilə mənsub olduğu millətin ədəbi düşüncəsinə, fikir və söz xəzinəsinə özünəməxsus təsiri olduğunu vurğulayıb. Əsərlərini universitetin kitabxana fonduna hədiyyə etməsini böyük töhfə kimi dəyərləndirib.
NDU-nun Elmi Kitabxanasının direktoru Xumar Məmmədova məruzə ilə çıxış edib.
TÜRKSOY-un Baş katibi Sultan Raev türk mədəniyyətinin böyük təbliğatçısı, macar yazıçı Şandor Lejakla bağlı yüksək fikirlər səsləndirib.
Azərbaycan Dövlət Pedaqoji Universitetinin beynəlxalq əlaqələr üzrə prorektoru, professor Mahirə Nağıqızı və Naxçıvan Muxtar Respublikası Yazıçılar Birliyinin sədri Asim Yadigar təqdimatın önəmindən söhbət açıblar.
Macarıstan Milli Assambleyasının sədr müavini, dünyaşöhrətli yazıçı Şandor Lejak qonaqpərvərliyə və xoş sözlərə görə təşəkkürünü bildirib. Azərbaycan və Macarıstan arasında bütün sahələrdə fəal əməkdaşlıq olduğunu, bu əməkdaşlığın inkişaf etdiyini deyib.
Sonra universitetin Elmi Kitabxanasında Şandor Lejakın kitablarının və Türk dünyasının ədəbiyyat nümunələrinin yer aldığı sərgiyə baxış olub.
TÜRKSOY-un Baş katibi Sultan Raev universitetin Elmi Kitabxanasına kitablar hədiyyə edib.
Tədbirin bədii hissəsində yallı və rəqs nömrələri ifa olunub. NDU Musiqi alətləri emalatxanasında hazırlanan qədim milli musiqi alətləri təqdim edilib. NDU-nun “Qədim xalq çalğı alətləri” ansamblının ifasında geniş konsert proqramı olub.
Bölmənin digər xəbərləri
