Macarıstanın səsvermə hüququndan məhrum edilməsi təşəbbüsü iflasa məhkumdur
Budapeşt, 17 yanvar, AZƏRTAC
Avropa İttifaqı Şurası yanvarın 18-də Macarıstanın səsvermə hüququndan məhrum edilməsinə dair qətnaməni müzakirə edəcək.
AZƏRTAC “Euractiv” informasiya saytına istinadla xəbər verir ki, qətnamənin layihəsində müzakirələrin aparılacağı iki əsas bənd var: Macarıstanın səsvermə hüququndan məhrum edilməsi ilə bağlı prosesə başlanmasına dair avropalı deputatlara çağırış və 2023-cü ilin dekabrında Budapeştə ayrılan 10 milyard avro vəsaitin qanuni olması ilə əlaqədar təhqiqatın nəticələri.
Birinci bəndlə əlaqədar olaraq, Aİ Müqaviləsinin 7.2-ci maddəsi parlamentin üçdə iki səs çoxluğunun təsdiqi ilə Macarıstanın qanunun aliliyini pozduğuna görə Avropa Şurası qarşısında ondan cavabdehlik tələb ediləcəyini və bundan sonra Aİ milli liderlərinin bu ölkənin səsvermə hüququndan məhrum edilməsinə qərar verə biləcəyini nəzərdə tutur. Lakin bu gün Slovakiyanın Baş naziri Robert Fiço bildirib ki, Macarıstanı Aİ-də səsvermə hüququndan məhrum etmək üçün bütün üzv ölkələrin razılığı lazımdır və Slovakiyanın indiki hökuməti buna heç vaxt razı olmayacaq.
İkinci məqama gəlincə, Aİ qanunvericiləri Avropa Komissiyasının Macarıstanın “şantajına” uyduğunu düşünür və Komissiyanın vəsait ayırmaq qərarının Macarıstanın məhkəmə sistemində və qanunun aliliyində obyektiv təkmilləşdirməyə əsaslanmadığını bildirir.
Vüqar Seyidov
AZƏRTAC-ın xüsusi müxbiri
Budapeşt
Bölmənin digər xəbərləri
