Tbilisi, 4 iyul, AZƏRTAC

Milli Məclisinin deputatları Arzu Nağıyev və Rauf Əliyev, Azərbaycan Uşaq və Gənclər Federasiyasının prezidenti Asif Əliyev, ölkəmizin Gürcüstandakı səfirliyin əməkdaşları və ictimaiyyət nümayəndələri iyulun 4-də Tbilisidəki Heydər Əliyev parkında Ümummilli Liderin abidəsini ziyarət ediblər.

AZƏRTAC xəbər verir ki, Ulu Öndər Heydər Əliyevin abidəsi önünə əklil qoyub, xatirəsi dərin ehtiramla yad olunub.

Səfərləri çərçivəsində azərbaycanlıların yığcam yaşadıqları Marneuli rayonunun Qızılhacılı kəndindəki idman kompleksində gənc və yeniyetmə futbolçular, eləcə də onların məşqçiləri, klub rəhbərləri ilə görüş keçirilib.

Görüşdə Azərbaycanın Gürcüstandakı səfiri Faiq Quliyev, Marneuli şəhərinin meri Kənan Ömərov, Kvemo Kartli bölgəsinin qubernatorunun müavini Kaxa Koberidze və digər rəsmi şəxslər iştirak ediblər.

Marneuli şəhərinin meri Kənan Ömərov Milli Məclisin deputatlarının Qızılhacılıya səfərlərini və bu görüşü Azərbaycan dövlətinin soydaşlarımıza göstərdiyi diqqət və qayğının davamı kimi qiymətləndirib.

Səfir Faiq Quliyev Azərbaycan dövlətinin Gürcüstanda yaşayan soydaşlarımıza göstərdiyi diqqət və qayğıdan danışıb. Bildirib ki, bu görüşün keçirildiyi idman kompleksi də Azərbaycan dövlətinin başçısının tapşırığına əsasən SOCAR tərəfindən tikilərək soydaşlarımıza hədiyyə olunub.

Bildirilib ki, bu idman kompleksinin futbol meydançasında Ulu Öndər Heydər Əliyevin 100 illik yubileyinə həsr olunmuş futbol turniri də keçirilib. Ümummilli Lider Heydər Əliyevin yubiley tədbirləri çərçivəsində bu gün Kvemo Kartli bölgəsindəki azərbaycanlılardan ibarət futbol komandalarına yeni idman formaları və topların hədiyyə olunması da tarixi hadisədir. Bu tədbir soydaşlarımızın idmana marağının artmasında, gənclərin asudə vaxtlarının səmərəli təşkilində və sağlam böyümələrində mühüm rol oynayacaqdır.

Sonra Milli Məclisinin deputatı Azərbaycan-Gürcüstan parlamentlərarası əlaqələr üzrə işçi qrupun rəhbəri Arzu Nağıyev, AFFA-nın vitse-prezidenti, Milli Məclisin deputatı Rauf Əliyev və başqaları çıxış edərək Azərbaycanda idmanın inkişafı, dövlətimizin uşaq və gənclərin sağlam böyümələri üçün həyata keçirdiyi layihələr, eləcə də Gürcüstandakı soydaşlarımızın inkişafına göstərilən diqqət və qayğıdan danışıblar.

Sonra Kvemo Kartli bölgəsindən olan Azərbaycan idman klublarına 100 dəst idman geyimi, futbol topları və digər hədiyyələr təqdim olunub.

Xətayi Əzizov

AZƏRTAC-ın xüsusi müxbiri

Tbilisi