Mart ayının üçüncü ongünlüyündə Kürdə suyun səviyyəsi aşağı düşmüşdür
Bakı, 4 aprel (AZƏRTAC). Ekologiya və Təbii Sərvətlər Nazirliyinin (ETSN) Ətraf Mühit üzrə Milli Monitorinq Departamenti Kür və Araz transsərhəd çaylarının, həmçinin onların transsərhəd qollarının çirklənmə səviyyəsini öyrənmək məqsədi ilə mart ayının üçüncü ongünlüyü üçün keçirdiyi növbəti monitorinqin nəticələrini açıqlamışdır.
ETSN-in mətbuat xidmətindən AZƏRTAC-a verilən məlumata görə, Kür çayında suyun sərfi mart ayının ikinci ongünlüyünə nisbətən azalaraq saniyədə 343 kubmetr təşkil etmişdir. Gürcüstan və Ermənistan ərazilərindən təmizlənmədən axıdılan məişət tullantıları və sənaye müəssisələrinin çirkab sularının təsiri nəticəsində çayda biogen maddələrin miqdarı normadan dəfələrlə artıq olmuşdur. Şıxlı-2 məntəqəsində suyun əsas çirkləndiricilərindən olan fenollar 3, mis birləşmələri 4, Ağstafaçay məntəqəsində fenollar 2, mis birləşmələri 3, Ağstafaçay su anbarında isə fenollar və mis birləşmələri 3 dəfə yol verilən qatılıq həddindən (YVQH) çox olmuşdur.
Araz çayında isə suyun sərfi saniyədə 210 kubmetr olmuşdur. Horadiz məntəqəsində fenollar 3, mis birləşmələri 4, Birinci Şahsevən məntəqəsində fenollar 2, mis birləşmələri 3, Bəhramtəpə məntəqəsində isə fenollar 3, mis birləşmələri 2 dəfə YVQH-ni keçmişdir.
Suyun oksigen rejimi bütün məntəqələrdə sanitar norma daxilində dəyişmişdir.
Bölmənin digər xəbərləri
