Maska və əlcəklərin ətraf mühitə atılması təbiətin çirklənməsinə səbəb olur
Bakı, 8 dekabr, AZƏRTAC
"İnsanlar arasında tibbi maskalardan istifadə göstəricilərinin artması xəstəliklə mübarizədə başlıca amillərdən sayılsa da, digər tərəfdən ətraf mühitlə əlaqədar problemlər də yaradır. Belə ki, bir çox hallarda istifadə edilən fərdi qoruyucu vasitələri - maska və əlcəklər tullantı qablarına deyil, ətraf mühitə atılır. Nəticədə təbiətdə yüz illərlə qala biləcək həmin vasitələr ətraf mühit üçün kifayət qədər təhlükəli və ciddi problemə çevrilir.
Yer kürəsi üçün qlobal təhlükə olan ətraf mühitin çirklənməsi pandemiya dövründə daha da ağırlaşıb. Alimlər qlobal epidemiyanın davam etdiyi hər ay ərzində dünya miqyasında 129 milyard maska və 65 milyard əlcəkdən istifadə edildiyini, həmçinin təbiətə atılan bir maskanın yoxa çıxmasının təxminən 500 ilə başa gələcəyini bildirirlər. Beləliklə, fərdi qoruyucu vasitələrin ətraf mühitə atılması ciddi çirklənməyə səbəb olur və nəticədə sağlamlığa zərərli təsir göstərir".
Dövlət Gömrük Komitəsi Tibbi Xidmət İdarəsinin əməkdaşı Şəhla Mirzəzadə bu barədə AZƏRTAC-a verdiyi müsahibədə deyib.
Onun dediyinə görə, dünyada ölüm hallarının 23 faizi və əlilliyin 22 faizinin ətraf mühitin çirklənməsi ilə əlaqədar olduğu aşkar edilib: “Maskaların ətraf mühitə atılması dolayısı ilə koronavirusun yayılması üçün də zəmin yaradır. Buna görə də yeni növ koronavirusla (COVID-19) mübarizədə əvəzsiz rola malik olan fərdi qoruyucu vasitələrdən doğru şəkildə istifadə etmək və daha sonra tullantı qablarına atmaq lazımdır. Bu, həm pandemiya ilə mübarizədə, həm də ətraf mühiti çirklənmədən qorumaq üçün vacib əhəmiyyətə malikdir”.
Mütəxəssis onu da qeyd edib ki, noyabrın 21-dən açıq havada da tibbi maskalardan istifadə olunması məcburidir. Təəssüf ki, əhalinin əksər hissəsi bir maskadan nəinki bir, hətta bir neçə gün istifadə edir: “Tibbi maskalardan istifadə onların növlərinə görə dəyişir. Belə ki, N95 və digər filtrli maska növləri ilə müqayisədə tibbi maskaların istifadə müddəti 2-3 saatdır. Onu da nəzərə almaq lazımdır ki, vətəndaşlar sadə maskalardan daha çox istifadə edirlər. Maskanın istifadə müddətindən artıq taxılması onda daha çox infeksiyanın toplanılmasına səbəb olur. Uzunmüddətli istifadə onun daha çox çirklənməsi deməkdir. Ona görə də 2-3 saatdan bir çirklənmiş tibbi maskalar dəyişdirilməlidir. Maskada zədələnmə və cırıq varsa, nəm haldadırsa, deməli, artıq yarasız haldadır və ondan istifadə etmək olmaz”, - deyə həmsöhbətimiz əlavə edib.
Bölmənin digər xəbərləri
