MAYKL CORDANIN OXŞARI BASKETBOLÇUDAN ONA BƏNZƏMƏSİNƏ GÖRƏ KOMPENSASİYA TƏLƏB ETMİŞDİR

10.07.2006 [16:47]
Çap et
A⁺ A^-

AZƏRTAC-ın xarici informasiya agentliklərindən aldığı xəbərə görə, Portlənd (ABŞ) sakini Allen Hekkard basketbol tarixində ən yaxşı oyunçulardan biri olan Maykl Cordanı və “Nike” şirkətinin əsasını qoyan Fil Naytı məhkəməyə vermişdir. O, Cordanı özünə çox oxşamaqda, Naytı isə canfəşanlıqla reklam kampaniyası sayəsində basketbolçunu dünyanın ən tanınmış adamlardan birinə çevirməkdə təqsirləndirmişdir.

Hekkardın fikrincə, Cordan öz oxşarlığı ilə onun bütün həyatını korlamışdır, çünki artıq 15 ildir onu həmişə basketbolçu ilə səhv salırlar, halbuki onun basketbolçu ilə heç bir qohumluq əlaqəsi yoxdur. Bununla da məşhur idmançı Portlənd sakininə mənəvi zərbə vurmuşdur.

Bununla barəbər, iddiaçı basketbolçudan 15 santimetr alçaqdır, lakin özü təsdiq edir ki, insanlar buna o qədər də fikir vermirlər. Maykl kimi, o da saçlarını dibindən qırxdırır, sol qulağına sırğa taxır və həvəskarlar səviyyəsində daim basketbol oynayır.

Allen Hekkard öz mənəvi iztirablarını 832 milyon dollar məbləğində dəyərləndirmişdir - bu məbləğin 50 faizini ona “Nike” şirkəti, qalanını isə Maykl Cordan ödəməlidir.

MAYKL CORDANIN OXŞARI BASKETBOLÇUDAN ONA BƏNZƏMƏSİNƏ GÖRƏ KOMPENSASİYA TƏLƏB ETMİŞDİR

MÜƏLLİFLƏ ƏLAQƏ

Bölmənin digər xəbərləri