MDB ölkələrinin iştirakı ilə “GLA Baku Summer Cup 2021” adlı turnir keçiriləcək
Bakı, 23 avqust, AZƏRTAC
“Gaming League Azerbaijan” və Azərbaycan Kiber İdman Federasiyasının təşkilatçılığı, Gənclər və İdman Nazirliyinin dəstəyi ilə “Valorant” oyunu üzrə beynəlxalq onlayn turnir keçiriləcək.
AZƏRTAC xəbər verir ki, “GLA Baku Summer Cup 2021” adlı yarışda MDB məkanından ümumilikdə 8 klub təmsil olunacaq. ВоЗ sistemi ilə keçiriləcək turnirdə “GMT”, “Axsor”, “Aim.Attack”, “Singularity”, “tyeasy”, “EZKatka”, “Moscow Five jr” və “Smarics Esports” komandaları mübarizə aparacaq.
“Gaming League Azerbaijan”ın rəhbəri Adil Mahmudov yarışın əhəmiyyəti barədə məlumat verib: “MDB ölkələrinin iştirakı ilə baş tutacaq turnirdə ən güclü qeymerlərin mübarizəsini izləmək imkanımız olacaq. Son illər kiberidman Azərbaycanda böyük populyarlıq qazanır. Məhz buna görə biz əhatə dairəmizi genişləndiririk. Artıq beynəlxalq onlayn turnirlərimiz ənənəvi xarakter daşıyır. Belə yarışlar kiberidmanı təbliğ etməklə yanaşı, həm də oyunçularımıza böyük təcrübə qazandırır”.
Yarışın ümumi mükafat fondu 5 min ABŞ dollarıdır. “GLA Baku Summer Cup 2021” avqustun 24-dən 31-nə kimi keçiriləcək. Oyunlar Bakı vaxtı ilə saat 19:00-da və 21:00-da başlayacaq.
Bölmənin digər xəbərləri
