REGİONLAR
MEHDİABADLI FERMERİN UĞURLARI
Zülfüqar Həsənov ixtisasca sürücü olsa da, indi təkcə Abşeron rayonunun Mehdiabad kəndində yox, onun hüdudlarından uzaqlarda da təcrübəli heyvandar kimi tanınır. O, AZƏRTAC-ın müxbiri ilə söhbətində demişdir ki, ölkədə aparılan aqrar islahatlar nəticəsində imkanların genişlənməsindən istifadə edərək sahibkarlıq fəaliyyətinə başlamışdır. Əvvəlcə üç inək bəsləyən fermer mütəxəssislərlə məsləhətləşmək və qabaqcıl təcrübəni tətbiq etməklə qısa müddətdə heyvanların baş sayını artırmışdır. İndi ailə üzvlərinin və yaxın qohumların çalışdığı bu təsərrüfatda 33 sağmal inək vardır.
Fermer deyir ki, süni mayalanma yolu ilə 23 baş Hollandiya cinsli buzov almışıq. Hər gün 120-140 litr süd sağırıq. Ötən il 1 tondan artıq ət, 30 tona yaxın süd istehsal etmişik. Emal sexlərində ucuz götürüldüyü ücün südü şəhərdə satıram. Kəndimizdə 68 sot torpağım var. Su dərdindən istifadəsiz qalıb. Yemi başqa rayondan alıram. Bu qış mövsümü üçün təkcə yoncaya 7 min ABŞ dolları xərcim çıxıb. Hələ kəpəyə, qüvvəli yemə xərclədiyimi demirəm.
Zülfüqar Həsənovun dediyinə görə, müvafiq qurumlar güzəştli şərtlərlə kredit versə, təsərrüfatı genişləndirər, lazımi texnika və avadanlıq alar, məhsul istehsalını artırar.