Mehmet Pamuk: Tarixi təhrif etmək yolu ilə Türkiyəni ləkələmək cəhdləri qəbuledilməzdir
Ankara, 24 aprel, AZƏRTAC
Tarixi təhrif etmək yolu ilə Türkiyəni ləkələmək cəhdləri qəbuledilməzdir. Hadisə və proseslərin istənilən qiymətləndirilməsi uydurma və emosiyalara deyil, yalnız faktlara və sübutlara əsaslanmalıdır.
AZƏRTAC xəbər verir ki, bu barədə jurnalistlərə Türkiyənin Zəfər Partiyasının qurucularından biri Mehmet Pamuk məlumat verib.
Ermənilərin qondarma “soyqırımı” mifini təbliğ edən Ankaranın əleyhdarlarının əməllərinə münasibət bildirən siyasətçi vurğulayıb ki, Osmanlı imperiyasının son illərində baş verən dramatik hadisələrin “soyqırımı” anlayışı ilə heç bir əlaqəsi yoxdur. “Bunun heç bir tarixi və hüquqi əsası yoxdur”, -deyən Zəfər Partiyasının nümayəndəsi 1915-ci il hadisələri ilə bağlı qərəzli bəyanatların sırf siyasi məqsədlər güddüyünə əminliyini ifadə edib.
Onun fikrincə, Türkiyə əleyhinə isteriya nə Ermənistana, nə də erməni xalqına xeyir verməyəcək. “Müasir Ermənistanın yaşadığı iqtisadi və siyasi problemlərin səbəblərindən biri Anadoluda baş verən faciəvi hadisələrlə bağlı “məntiqsiz inadkarlıq”dır, sülh, qarşılıqlı hörmət və tarixi həqiqətlərin qəbul edilməsi isə bütün regionun xeyrinə olacaq prinsiplərdir”, -deyə türkiyəli siyasətçi qeyd edib.
Pamuk xatırladıb ki, Türkiyə uzun illərdir bütün arxivlərini ekspert və tarixçilərin üzünə açmağa hazır olduğunu bəyan edir. O vurğulayıb: “Arxivlərimiz açıqdır. Lakin ermənilər birgə elmi komissiyanın yaradılması təşəbbüsünü dəstəkləmir. Çünki həqiqət yalan bəyanatların əsaslarını məhv edəcək. Türkiyə və onun xalqı öz tarixindən utanmır”.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
