Məktəb direktoru: Bütün sahələrdə uğurlarımız ölkəmizin beynəlxalq nüfuzunu təmin edir
Bakı, 12 mart, AZƏRTAC
Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi ilə rəşadətli ordumuz tərəfindən torpaqlarımızın erməni işğalından azad edilməsi xalqımızın 30 illik Qarabağ həsrətinə son qoydu. Bu şanlı Qələbə Müzəffər Ali Baş Komandanın rəhbərliyi, yenilməz ordumuzun şücaəti və qəhrəmanlığı, Vətənə sevgisi sayəsində mümkün oldu. 2020-ci il sentyabrın 27-də Təhlükəsizlik Şurasının iclasında Prezident İlham Əliyev deyib: “Ordu quruculuğu mənim fəaliyyətimdə həmişə birinci yerdədir. Hərbçilər də, Azərbaycan xalqı da bunu bilir. Həmişə demişəm ki, ordumuz üçün nə lazımdırsa, biz onu da edəcəyik. Biz güclü, iradəli ordu yaratmışıq. Bizim bütün silahlı birləşmələrimiz müasir standartlara cavab verir və döyüş tapşırığını şərəflə, vicdanla, cəsarətlə yerinə yetirir”.
Bu fikirləri AZƏRTAC-a açıqlamasında Bakı şəhəri 300 saylı tam orta məktəbin direktoru İradə Xəlilova söyləyib.
“Azərbaycan Ordusunun qısa zamanda həyata keçirdiyi uğurlu əməliyyatlar, İkinci Qarabağ müharibəsində düşmənin çoxlu sayda canlı qüvvə və zirehli texnikasının, strateji əhəmiyyətli hərbi bazalarının məhv edilməsi ordumuzun ən müasir texnika və hərbi avadanlıqlarla təchiz olunmasından, Silahlı Qüvvələrimizin yüksək döyüş hazırlığından, peşəkar hərbi kadrlara malik olmasından xəbər verirdi. Vətən müharibəsi dövründə hər gün cəbhədən gələn xoş xəbərlər, kənd, şəhər və qəsəbələrimizin işğaldan azad edilməsi hər birimizdə böyük ruh yüksəkliyi yaşadırdı. Biz, Azərbaycan xalqına bu Qələbə sevincini bəxş edən Müzəffər Ali Baş Komandana, şanlı Azərbaycan əsgərinə və şəhidlərimizə borcluyuq. Ölkə rəhbərinin qətiyyətli addımları, uğurlu diplomatiyası və xalq-dövlət birliyi 30 ilə yaxın bir müddətdə erməni işğalı altında olan əzəli torpaqlarımızı əsl sahibinə qaytardı. Azərbaycanın qədim şəhəri, incisi, mədəniyyət beşiyi olan Şuşada, Qarabağda üçrəngli bayrağımız dalğalandı. Həmçinin Azərbaycan, Rusiya və Ermənistan liderləri tərəfindən üçtərəfli Bəyanatın imzalanması ilə ölkəmiz hərb sahəsindəki Qələbəsini siyasi müstəvidə də təmin etdi. Fevralın 26-da Prezident İlham Əliyev yerli və xarici media nümayəndələri üçün keçirdiyi mətbuat konfransında dünyanın aparıcı KİV-lərinin nümayəndələrinə Xocalı soyqırımı həqiqətləri və 44 gün davam edən Qarabağ müharibəsi ilə bağlı ətraflı məlumat verdi. Onların suallarını 4 dildə, 4 saat davam edən mətbuat konfransında geniş və əhatəli cavablandırdı”, - deyə məktəb direktoru qeyd edib.
İradə Xəlilova Azərbaycanın bütün sahələrdə əldə etdiyi uğurlardan da söz açıb. Bildirib ki, uğurlarımızın təməlində son 17 ildə Prezident İlham Əliyevin qətiyyətlə həyata keçirdiyi iqtisadi inkişaf strategiyası dayanır. Ötən müddət ərzində respublikamızın iqtisadi, siyasi və mədəni həyatında böyük nailiyyətlər qazanılıb. Dövlətimizin apardığı uğurlu xarici siyasətə bu gün dünya birliyi tərəfindən rəğbət və dəstək var. Müstəqilliyimizin ilk illərindən Azərbaycan ən mötəbər təşkilatlarda bərabərhüquqlu ölkə kimi təmsil olunub. Prezident İlham Əliyevin rəhbərliyi ilə Azərbaycan dinamik inkişaf və yüksəliş yolunda inamla addımlayır, beynəlxalq mövqelərini daha da möhkəmləndirir. Azərbaycanın dünyada qazandığı yüksək imici ona ən böyük mötəbər beynəlxalq təşkilatların tədbirlərini, beynəlxalq simpozium və konfransları keçirməyə imkan yaradıb. Eyni zamanda, ölkə rəhbərinin xarici siyasəti, xalqın milli mənafeyinə xidmət edən diplomatiyası, qətiyyətli mövqeyi dünya tərəfindən qəbul edilir, bugünkü və gələcək uğurlarımızın təminatına çevrilir.
Bölmənin digər xəbərləri
