Məktəb direktoru: İşğaldan azad edilmiş ərazilərimizdə dövlətimiz tərəfindən mühüm layihələr həyata keçirilir
Bakı, 13 mart, AZƏRTAC
Xalq-ordu-dövlət birliyi, möhkəm iradə, dözüm və qətiyyətli addım, müdrik və uzaqgörən siyasət, uğurlu diplomatiya nəticəsində 44 günlük Vətən müharibəsində şanlı Qələbə qazandıq. Bu, həmçinin 30 illik Qarabağ həsrətinə son qoyulması, əzəli torpaqlarımıza böyük qayıdış deməkdir. Prezident İlham Əliyevin dediyi kimi indi böyük qayıdış, böyük inkişaf prosesləri başlanmalıdır. Müzəffər Ali Baş Komandan İlham Əliyevin rəhbərliyi ilə rəşadətli ordumuzun işğaldan azad etdiyi ərazilərimizdə bərpa və quruculuq istiqamətində dövlətimiz tərəfindən mühüm addımlar atılır. Bu baxımdan bölgələrimizin inkişafını sürətləndirmək və regionun tranzit əhəmiyyətini artırmaq üçün yeni, müasir standartlara uyğun yollar inşa olunur, müxtəlif layihələrin reallaşdırılması istiqamətində böyük işlər görülür. Prezident İlham Əliyev yanvarın 14-də Əhmədbəyli-Füzuli-Şuşa avtomobil yolunun 27-ci kilometrində Füzuli-Şuşa yolunun, həmçinin Füzuli rayonunda hava limanının təməllərini qoydu. Hazırda Füzuli Beynəlxalq hava limanının tikintisi uğurla davam etdirilir. Həmçinin Laçın rayonunda Güləbird Su Elektrik Stansiyası işə salınıb, Şuşa şəhərinin elektrik enerjisi ilə təchizatının birinci mərhələsi başa çatıb.
Bu fikirləri AZƏRTAC-a açıqlamasında 220 nömrəli məktəbin direktoru Lətifə Əzimova söyləyib.
“Həmin ərazilərin bərpa edilməsi nəinki Azərbaycanda yeni nəqliyyat yolunun açılmasına səbəb olacaq, həmçinin Avrasiya üzrə yeni istiqamət olacaq. Elektrik enerjisi, inşaat işləri, kənd təsərrüfatı, içməli su ilə bağlı layihələrin həyata keçirilməsi dövlətimizin diqqət mərkəzindədir. Qarabağda sosial obyektlərin, inzibati binaların, idman komplekslərinin, mədəniyyət ocaqlarının və s. inşası nəzərdə tutulur. Bu sahədə müxtəlif infrastruktur layihələri reallaşdırılır. İşğaldan azad olunmuş ərazilərimizdə kənd təsərrüfatı üçün də zəngin imkanlar var. Artıq bir sıra yerlərdə müəyyən işlərə başlanılıb, buğda əkilib. Qarabağın “yaşıl enerji” zonası elan olunması da əbəs yerə deyil. Bu ərazilərdə ekoloji vəziyyətin bərpası üçün kompleks tədbirlərin görülməsi nəzərdə tutulur. Regionun böyük potensialı hesabına “yaşıl enerji” zonasına çevrilməsi planlaşdırılıb. Belə ki, Kəlbəcər-Laçın zonasında güclü külək olması səbəbindən külək stansiyalarının, Cəbrayıl-Zəngilan zonasında günəş şüalarının keyfiyyətinin və miqdarının çox olması ilə külək stansiyalarının tikilməsi bu zonanın “yaşıl enerji” zonası elan edilməsinə gətirib çıxarır. Bundan başqa, Zəngilan rayonunun üç kəndində “ağıllı kənd” layihəsi həyata keçirilərkən müasir texnologiyalardan istifadə ediləcək. İnanırıq ki, ölkə başçısının rəhbərliyi ilə Qarabağ regionun ən müasir və inkişaf etmiş ərazisinə çevriləcək. Qarabağ Azərbaycandır! Yaşasın Azərbaycan!",- deyə Lətifə Əzimova fikrini yekunlaşdırıb.
Bölmənin digər xəbərləri
