Məlumatların idarə olunması və şəhər sistemlərinə inteqrasiyası xüsusi əhəmiyyət daşıyır
Bakı, 22 may, AZƏRTAC
Dayanıqlı İnkişaf Məqsədləri (SDG) daha geniş yanaşma tələb edir və bu proses bütün idarəetmə səviyyələrində kollektiv fəaliyyətin gücləndirilməsinə əsaslanır.
AZƏRTAC xəbər verir ki, bunu İordaniya Ofisinin regional layihə koordinatoru Ghada Al Said Bakıda keçirilən BMT-nin Ümumdünya Şəhərsalma Forumunun 13-cü Sessiyası (WUF13) çərçivəsində “Məlumatların daha yaxşı şəhərlərə çevrilməsi: İordaniyanın mənzil və xidmətlərə inteqrasiya olunmuş yanaşması” mövzusunda tədbirdə deyib. O qeyd edib ki, dayanıqlı inkişafın real nəticələri yerli səviyyədə formalaşır və SDG-lərin 65 faizdən çoxu yerli idarəetmələrin planlaşdırma, xidmətlərin göstərilməsi, icra və koordinasiya imkanlarından asılıdır. Yerli hökumətlər və bələdiyyələr urbanizasiya, nəqliyyat, mənzil təminatı, iqlim dəyişikliyi, tullantıların idarə olunması, su qıtlığı, sosial bərabərsizlik və xidmətlərə çıxış kimi bir-biri ilə əlaqəli çağırışlarla birbaşa qarşılaşırlar.
O əlavə edib ki, sürətlə inkişaf edən və məlumatla zənginləşən müasir dünyada məlumatların idarə olunması və şəhər sistemlərinə inteqrasiyası xüsusi əhəmiyyət daşıyır. Düzgün qərarqəbuletmə mühiti yaratmaq üçün məlumatların toplanması və yaxşı qurulmuş platformalarda istifadəsi zəruridir.
Bölmənin digər xəbərləri
