Mərkəzi Neftçilər Xəstəxanasında yeni autoimmun laboratoriyası istifadəyə verilib
Bakı, 4 fevral, AZƏRTAC
Laboratoriya xidmətlərinin keyfiyyətinin yüksəldilməsi, müasir tibbi standartlara uyğunlaşdırılması və diaqnostik imkanların genişləndirilməsi məqsədilə Tibbi Ərazi Bölmələrini İdarəetmə Birliyi (TƏBİB) tərəfindən laboratoriyaların yenidən təşkili istiqamətində ardıcıl və sistemli tədbirlər həyata keçirilir.
TƏBİB-in mətbuat xidmətindən AZƏRTAC-a verilən məlumata görə, bu çərçivədə Bakı şəhərində autoimmun laborator müayinələrin mərkəzləşdirilmiş və optimallaşdırılmış şəkildə təşkili təmin olunub.
Mərkəzi Neftçilər Xəstəxanasında ilk dəfə olaraq autoimmun xəstəliklərin laborator diaqnostikası üzrə ixtisaslaşmış laboratoriya yaradılıb və hazırda tam şəkildə fəaliyyət göstərir.
Layihə çərçivəsində autoimmun xəstəliklərin diaqnostikası üçün nəzərdə tutulan tam avtomatik laboratoriya infrastrukturu qurulub. Yeni qurulan laboratoriya beynəlxalq tibbi və laboratoriya standartlarına cavab verən müasir texniki infrastrukturla tam təchiz olunub. Analizlərin aparılması üçün yüksək dəqiqlikli avtomatlaşdırılmış avadanlıqlar olan “Euroimmun Analyzer I”, “EuroBlotOne”, “EuroPattern Microscope Live”, “IF Sprinter”, “Eurostar IV Plus microscope” cihazları quraşdırılaraq istismara verilib.
Layihə çərçivəsində laboratoriyanın dayanıqlı və effektiv fəaliyyətinin təmin edilməsi məqsədilə işçi heyətin bilik və bacarıqlarının artırılmasına xüsusi diqqət yetirilib. Belə ki, laboratoriya əməkdaşları müasir diaqnostik metodlar, avtomatlaşdırılmış sistemlərin istismarı və analiz nəticələrinin düzgün interpretasiyası üzrə peşəkar təlimlərə cəlb edilib.
Qeyd edək ki, Mərkəzi Neftçilər Xəstəxanasında qurulan yeni autoimmun laboratoriya müxtəlif autoimmun xəstəliklərin erkən mərhələdə aşkarlanması, diaqnostik proseslərin sürətləndirilməsi və nəticələrin yüksək dəqiqliklə əldə olunması baxımından mühüm əhəmiyyət kəsb edir. Bu isə həm pasiyentlər üçün göstərilən tibbi xidmətlərin keyfiyyətinin artırılmasına, həm də həkimlərin klinik qərarvermə prosesində daha etibarlı laborator məlumatlarla təmin olunmasına imkan yaradır.
Bölmənin digər xəbərləri
