Meşələrimizi kimdən və necə qoruyaq? REPORTAJ VİDEO
İsmayıllı, 27 avqust, Rəşad Türkoğlu, AZƏRTAC
Son günlər ölkə ərazisində, əsasən də meşə massivlərində yanğınların baş verməsi, təbiət qoynuna istirahət məqsədi ilə üz tutanların məsuliyyətli və diqqətli olmasını daha da vacib edir. Maraqlıdır, bölgələrə üz tutan vətəndaşlar, eləcə də icarədarlar hansısa yanğının baş verməməsi üçün nələrə diqqət edirlər?
AZƏRTAC xəbər verir ki, iş həftəsinin yorğunluğunu çıxarmaq, eləcə də bu isti günlərdə dincəlmək, xoş-əyləncəli anlar yaşamaq istəyənlər arasında həftəsonları İsmayıllının gəzməli-görməli yerlərinə üz tutanlar da az deyil. Rayona gələn qonaqların əksəriyyəti istirahətlərini sıx ağacların olduğu ərazilərdə təşkil etməyə üstünlük verirlər. Bu halda hər tərəfi iri ağaclarla əhatə olunan ərazidə ocaq qalanır, müxtəlif yeməklər bişirilir, samovara od salınır. Bir sözlə, hər an yanğının baş vermə təhlükəsi yaranır. Belə olduqda təhlükəsizlik qaydalarına ciddi əməl olunmalıdır.
Meşənin qoynunda, gözəl bir guşədə istirahəti tonqal üstündə bişirilən ləziz yeməklərsiz təsəvvür etmək nə qədər çətindirsə, sonradan baş verən yanğını göz önünə gətirmək də bir o qədər üzücüdür. Meşələrin məhv olmasının əsas səbəblərindən biri məhz onun yanğınlara məruz qalmasıdır. Təsadüfi deyil ki, hər il dünyanın müxtəlif bölgələrində baş verən meşə yanğınları xeyli yaşıllığı məhv edir. İnsanların məsuliyyətsizliyi ucbatından uzun illər qorunub saxlanmış meşələr, nadir ağaclar bir anda məhv olur. Bu da son nəticədə planetdə təbii balansın pozulması, həmçinin fauna və floranın məhvi, müxtəlif xəstəliklərin yaranması kimi fəsadlara yol açır. Bir sözlə, təbiətin məhv edilməsində əsas amil insan faktorudur. Ona görə də təbiəti elə özümüzdən qorumalıyıq.
Rəna İbrahimova həftəsonu istirahət günlərini fürsət bilib doğmaları ilə birgə təbiət qoynuna üz tutan paytaxt sakinlərindən biridir. Günün birinci yarısı meşə ətrafında, sıx ağacların altında gəzərək mənəvi dinclik tapan Rəna xanım, ailəsi ilə birgə nahar vaxtı münasib bir ərazidə samovar qalamışdı. Müsahibimiz deyir ki, meşələri, ağacları, buradakı canlıları qorumaq üçün od-ocaqla ehtiyatlı davranmaq lazımdır. Çünki bir balaca köz meşəni məhv edə bilər. Vətəndaşlarla bərabər, bu yerləri icarəyə verən sahibkarlar da məsuliyyətli olmalıdılar ki, sonradan böyük fəlakətlə üz-üzə qalmayaq.
Söhbətimizi yekunlaşıdırıb, bu ərazini müştərilərə istirahət üçün təqdim edən Sima Məmmədova ilə görüşdük. Baş verə biləcək yanğının qarşısını vaxtında almaq üçün hansı tədbirlərin görüldüyü ilə maraqlandıq.
Onun sözlərinə görə, əraziyə qonaq qismində gələn hər bir şəxsə təhlükəsizlik qaydalarına əməl edilməsi ilə bağlı məlumat verilir: “Biz təkcə təlimat verməklə işimizi bitmiş saymırıq, eyni zamanda, qonaqlar burada olduğu müddətdə, eləcə də ərazini tərk etdikdə yandırılan ocaqlara nəzarət edirik. Təmizliyə riayət olunmasını, odla ehtiyatlı olmağı tövsiyə edirik. Ocağı torpaq üzərində yandırmamaq üçün qonaqlara manqal veririk. Amma vətəndaşlar da öz üzərilərinə düşən məsuliyyətin fərqində olsalar yaxşı olar. Nəzərə alsaq ki, hazırda yayın ən isti günləridir, burada yanğın baş versə, onu günlərlə söndürmək çətin olar. Ona görə də özümüz qonaqlara nəzarət edirik”.
Xatırladaq ki, son bir həftə ərzində şimal rayonlarında baş verən yanğınlar səbəbindən 5000 hektar ərazidə müxtəlif ağaclar, kollar, otlaq sahələri, meşədə yaşayan heyvanlar məhv olub, vətəndaşlara zərər dəyib. Belə halların baş verməməsi üçün istirahətə üz tutanlarla bərabər, icarədarlar da diqqətli, məsuliyyətli, eyni zamanda, tədbirli olmalıdılar.
İsmayıllı rayon Fövqəladə Hallar Komissiyasının sədr müavini Şahin Hüseynov da meşələrimizin qorunmasının vacibliyini bir daha vurğulayıb. O, bununla əlaqədar rayon ərazisində mütəmadi təbirlərin görüldüyünü diqqətə çatdırıb. “İsmayıllı rayonu ərazisində yanğınların baş verməməsi üçün tərəfimizdən mütəmadi olaraq otellərdə, istirahət mərkəzlərində, turizm obyektlərində sahibkarlara görüşlər keçirilir, maarifləndirici söhbətlər aparılır. Xüsusilə meşə və dağlıq ərazilərdə olan icarədarlara diqqətli və məsuliyyətli olmaq barəsində təlimatlar verilir. Görülən tədbirlər sayəsində rayonumuzda son illərdə böyük miqyaslı yanğınlar qeydə alınmayıb”, - deyə o əlavə edib.
Əbəs yerə ana təbiətin bəşəriyyətə bəxş etdiyi füsunkar gözəlliklərdən olan meşələri Yer kürəsinin “ağ ciyərləri” adlandırmırlar. Meşələrin təmiz havası, oksigen zənginliyi, fauna və floranın gözəlliyi uşaqdan tutmuş böyüyədək hər kəsin rahatlıq və sərbəstlik məkanı sayılır. Ona görə də, gəlin, hər birimiz ana təbiətimizi qoruyaq.
Bölmənin digər xəbərləri
