MƏTBUAT ŞURASI İDARƏ HEYƏTİNİN İCLASI KEÇİRİLMİŞDİR
Əvvəlcə MŞ-nin sədri Əflatun Amaşovun avqust-sentyabrda görülmüş işlərə dair hesabatı dinlənilmişdir. Bildirilmişdir ki, bu dövrdə quruma 35 müraciət daxil olmuş, bunların 15-i şuranın səlahiyyətlərinə aid olmamışdır.
Qeyd olunmuşdur ki, Azərbaycan Mətbuat Şurasının nümayəndələri sentyabrda Avropa Müstəqil Mətbuat Şuraları Alyansının Sofiyada illik toplantısında, Türkdilli dövlətlərin və topluluqların 10-cu dostluq, qardaşlıq və əməkdaşlıq qurultayında iştirak etmişlər.
Keçmiş postsovet məkanının digər ölkələrində mətbuat şuraları üçün vahid modelin hazırlanması məqsədi ilə Bakıda Azərbaycan Mətbuat Şurasının 3 illik fəaliyyətinin təhlilinə həsr olunmuş beynəlxalq tədbirin keçirilməsi təklifi irəli sürülmüşdür. Digər təklif isə gələn ilin aprelində türkdilli ölkələrin jurnalistlərinin Bakıda toplantısının keçirilməsi olmuşdur.
Hesabat idarə heyəti üzvləri tərəfindən məqbul sayılmışdır.
Sonra MŞ-nin şikayətlər üzrə komissiyasının idarə heyətinə təqdim etdiyi rəylər nəzərdən keçirilmişdir.
“İnterfaks-Azərbaycan” informasiya agentliyi, Zərdabi Mətbuat Mərkəzi, Tərəfsiz Jurnalistlər İctimai Birliyi, “Yeni Tərtər” və “Qərb xəbərləri” qəzetləri Mətbuat Şurasına üzv qəbul edilmişdir.
İclasda mətbuatımızın dili ilə bağlı ümumrespublika konfransına hazırlıq məsələləri də müzakirə olunmuş, tədbirin noyabrın 4-də keçirilməsi qərara alınmışdır. Konfransda şuranın dil komissiyasının üzvləri ilə yanaşı KİV rəhbərləri, jurnalistlər, həmçinin ölkəmizin tanınmış dilçi alimləri iştirak edəcək, əsasən mətbu dilin xüsusiyyətlərinə, bu sahədəki mövcud problemlərə, onların həlli yollarına diqqət yetiriləcəkdir.
İdarə heyətinin iclasında ölkə jurnalistlərinin IV qurultayına hazırlıq məsələsinə də toxunulmuş, hesabat xarakterli qurultayın noyabrın axırı - dekabrın əvvəllərində keçirilməsi müəyyənləşmişdir.
