Metronun “Gənclik” stansiyasında Gəmiçiliyin 160 illiyinə həsr olunan fotoqalereya açılıb VİDEO YENİLƏNİB
Bakı, 10 sentyabr, Elvin Camalov, AZƏRTAC
“Azərbaycan Xəzər Dəniz Gəmiçiliyi” (AXDG) QSC və “Bakı Metropoliteni” QSC-nin birgə təşkilatçılığı ilə “Gənclik” metrostansiyasında “Metro Gallery” layihəsi çərçivəsində “Gəmiçilik-160 il” mövzusunda fotoqalereya açılıb.
AZƏRTAC xəbər verir ki, bu dəfə paytaxt sakinləri və Bakının qonaqları “Gənclik” stansiyasının hər dörd çıxışının əsas vestibüllərində Azərbaycan Xəzər Dəniz Gəmiçiliyinin tarixini əks etdirən nadir fotoları görmək imkanı qazanıb.
Fotosərginin açılışda çıxış edən “Azərbaycan Xəzər Dəniz Gəmiçiliyi” QSC-nin mətbuat katibi Mehman Mehdiyev bildirib ki, Azərbaycan Xəzər Dəniz Gəmiçiliyinin 160 illik yubileyinə həsr olunan sərgidə 90-dan çox foto nümayiş edilir: “Fotoların hər biri Xəzərdə Azərbaycan gəmiçiliyinin müxtəlif dövrlərini əhatə edir. Burada Xəzər dənizində üzən ilk gəmilər, tanınmış dənizçilər, neft mədənləri, tacirlər haqqında maraqlı fotolara rast gəlmək mümkündür”.
Sərgidə müxtəlif arxivlərdən əldə edilən nadir fotolar nümayiş olunur. Onların əksəriyyəti araşdırmaçı-jurnalist, Bakı Media Mərkəzinin redaktoru, əməkdar mədəniyyət işçisi Müsəllim Həsənovun araşdırması ilə ortaya çıxıb. Gəmiçiliyin sifarişi əsasında tarixi-sənədli kitab yazan Müsəllim Həsənov qeyd edib ki, fotoların hər biri özündə böyük bir tarixi yük daşıyır. O bildirib ki, foto işlər həm Azərbaycanın, həm də Rusiyanın arxivlərindən əldə olunub.
Çıxış edən uzaq səfərlər kapitanı Muxtar Axundov Gəmiçiliyin qəhramanlıqlarla dolu tarixi və bugünkü dinamik inkişafı haqqında məlumat verib.
“Bakı Metropoliteni” QSC-nin mətbuat katibi Bəxtiyar Məmmədov isə deyib ki, bu tipli tədbirlər Bakı Metropoliteninin davamlı reallaşdırdığı sosialyönümlü proqramlarının tərkib hissəsidir: “Ümid edirik ki, Azərbaycan Xəzər Dəniz Gəmiçiliyi ilə həyata keçirilən bu sərgi böyük maraqla qarşılanacaq. Çünki, burada doğrudan da, heç yerdə rast gəlinməyən fotolar mövcuddur”.
Sərgilənən hər fotonun yanında yerləşdirilən paspartuda onun anotasiyası qeyd edilib. Bundan başqa, sərgi izləyicilərinə fotoşəkillər barədə virtual məlumat almasına da şərait yaradılıb. Belə ki, izləyicilər smartfonları vasitəsilə şəkillərdəki “QR” koddan istifadə edərək Bakı metropoliteninin rəsmi saytında yerləşdirilmiş elektron qalereyaya daxil ola və fotoların yüksək keyfiyyətlə nümunələrini yükləyə bilər.
Fotolar ilin sonuna kimi sərgilənəcək. Bununla da stansiya keçidlərindən istifadə edən metro sərnişinləri - paytaxt sakinləri və şəhərimizin qonaqları, eləcə də mövzu ilə maraqlanan hər kəs Xəzər sularında gəmiçiliyin inkişaf tarixinə virtual səyahətə çıxmaq fürsəti əldə edəcək.
Xatırladaq ki, bu il Azərbaycan Xəzər Dəniz Gəmiçiliyi 160 illik yubileyini qeyd edir. Xidmət sahəsinin müxtəlifliyinə görə “Azərbaycan Xəzər Dəniz Gəmiçiliyi” QSC unikal gəmiçilik şirkətlərdən hesab olunur.
Bölmənin digər xəbərləri
