“METRO”YA TEXNİKİ MƏĞLUBİYYƏT VERİLDİ

04.04.2006 [21:46]
Çap et
A⁺ A^-

AZƏRTAC xəbər verir ki, aprelin 4-də kişi voleybolçular arasında ölkə çempionatının final yarışları başlamışdır. Qızıl medallar uğrunda “Azərneft-1” və “Metro” komandaları mübarizə aparırlar. Xatırladaq ki, iki dövrədən ibarət pley-off mərhələsində bu komandalar arasında qələbələrin sayı eyni olduğundan, reqlamentə əsasən, qalib üç görüşdən ibarət final oyunlarında müəyyənləşməlidir.

Aprelin 4-də Bakı İdman Sarayında “Metro” voleybolçuları ilk final görüşünə çıxmadıqları üçün onlara 3:0 hesablı texniki məğlubiyyət verilmişdir.

Azərbaycan Voleybol Federasiyasından bildirmişlər ki, “Metro” komandası məşqçilərinin təqdim etdikləri ərizədə oyundan imtina etmələrinə əsas səbəb kimi, “Azərneft-1”in heyətində çıxış edən Mərdan Əzimovun klubun oyunçusu olmaması göstərilmişdir. Yığma komandamızın baş məşqçisi Oqtay Musayevin sözlərinə görə, əslən türkmənistanlı olan Mərdan Əzimov Azərbaycan vətəndaşlığını daşıyır və yığma komandamızın üzvüdür.

Aprelin 5-də keçiriləcək növbəti finalda “Azərneft-1” qələbə qazanarsa, növbəti dəfə Azərbaycan çempionu olacaqdır.