Milli birlik milli mənlik şüurunun yeni atributu kimi: xaricdən baxış
Bakı, 2 dekabr, AZƏRTAC
Milyonlarla azərbaycanlının arzuladığı Böyük Qələbə reallığa çevrildi. Onlar rahat nəfəs aldılar, öz Vətəninə görə sevinc və qürur hissi yaşadılar. Əsgərlərimizə ehtiram, ölkəmizin lideri İlham Əliyevin böyüklüyünün dərk edilməsi - bu hisslər qamması bizi yenidən birləşdirdi.
AZƏRTAC-a daxil olmuş “Milli birlik milli mənlik şüurunun yeni atributu kimi: xaricdən baxış” sərlövhəli məqalə bu mövzuya həsr edilib.
Müəllifləri sosiologiya üzrə elmlər doktoru, M.V. Lomonosov adına Moskva Dövlət Universitetinin Sosiologiya fakültəsinin Kommunikativ sistemlərin sosiologiyası kafedrasının müdiri, professor Ağamalı Məmmədov və fəlsəfə elmləri doktoru, Rusiya Elmlər Akademiyasının Rusiya Fəlsəfə Cəmiyyətinin “Mədəniyyətlərin dialoqu: fəlsəfi dünyabaxışı problemləri” tədqiqat qrupunun rəhbəri Ariz Gözəlov olan məqalədə deyilir: “Gözlədiyimiz gün gəlib çatdı! Sanki biz hamımız daha da saflaşdıq, daha da ucaldıq. Prezidentin nitqlərinə xas olan cəhətlər - milli prioritetlərin inamla və dürüst aktuallaşması, diplomatik və idarəçilik mədəniyyəti, ardıcıllıq və dönməzlik istisnasız olaraq hamı tərəfindən dəstəkləndi. Hər cəhətdən regionun dominant ölkəsi olmaqla biz Qarabağ məsələsinin həllinin alternativinin olmadığını başa düşürdük və buna əmin idik”.
Müəlliflər qeyd edirlər ki, orduda cəmləşmiş qüvvə və potensial geosiyasi mənzərəni kökündən dəyişməyə, illər boyu bizə zorla qəbul etdirilən stereotipləri və mifləri aradan qaldırmağa, öz böyüklüyümüzü və tarixdə yerimizi dərk etməyə imkan verdi.
Məqalədə deyilir: “Bu qüdrət göydən düşməyib, o, milyonlarla insanın əməyi ilə yaranıb. Müasir tarixdə saysız-hesabsız sərvətə malik olduqlarına baxmayaraq, müflisləşmiş dövlətlər çoxdur. Bu sərvətlər heç də hər dərdin çarəsi deyil. Bu sərvətlərin sosial kapital şəklində şaxələndirilməsi yalnız bütün səviyyələrdə Vətən naminə çalışmaq sayəsində mümkündür. Bizim əsgərin məğlub etdiyi düşmənə münasibətdə “igid basdığını kəsməz” prinsipini əsas tutaraq göstərdiyi nəciblik insanların qəlbində rəğbət doğurmaya bilməzdi. İndi qoy terrorizmin və millətçi faşizmin beynəlxalq himayədarları, bədxah “ekspertlər” kin-küdurət içində vurnuxa-vurnuxa qalsınlar, Nikol Paşinyanın və Ermənistanın əvvəlki başabəla rəhbərlərinin faciəli səhvlərini axtarsınlar. Bütün bunlar hədərdir. Tarix başqa cür yazılır”.
Həmvətənlərimizin məqaləsində deyilir ki, tarix müxtəlif telekanallarda hay-küy salan yalançı ekspertlərin çığır-bağırının məcmusu deyil. O (tarix), çoxcəhətli, lakin obyektiv və bəzi məsələlərdə ədalətlidir. Vətən müharibəsində bütün Azərbaycan xalqının böyük Qələbəsi tarixin salnaməsinə yazıldı. Tarix karvanı paxıl cığırdaşların gözləmədiyi yolla getdi və onun bələdçiləri heç də millətçilər olmadı. Olimpdə yer azdır, lakin bu yeri yalnız ona layiq olanlar, hər gün döyüşə gedənlər tutur. Yalnız çəkişmə və ziddiyyətlərdən uca durmağı bacaran, ümumi məqsədi olan və öz liderinə inanan xalq qələbəyə layiqdir. Şübhə yoxdur ki, bu müharibə hərb elmi tərəfindən təhlil ediləcək, çünki bir sıra parametrlərə görə o, sözün tam mənasında XXI əsrin birinci müharibəsi oldu. Dörd il ərzində itirilmiş ərazilər 44 gün ərzində uğurla azad edildi. Özü də xarici təzyiqin çox güclü olmasına rəğmən. Bu müharibə barbarlıq və təcavüzkar separatizm üzərində sivilizasiyalı qələbə mövqeyindən qiymətləndiriləcək, hökmən qiymətləndiriləcək! Ya Vətən, ya ölüm - bu sözlər hər kəs üçün dilemmaya çevrilmişdi. Vətən dirçəldi! Biz siyasi millətin rekonstruksiyası prosesinin şahidləri və fəal aktorları olduq. Bu prosesdə əhali xalqa çevrildi, hər bir vətəndaş özünü ordunun bir hissəsi hesab edirdi. Hər kəsin böyük Qələbədə iştirakı kimi əvvəllər misli görünməmiş bir hiss formalaşdı.
Təcrübə göstərir ki, siyasi millətin yaranması “arxetipik çala-çuxurlarla dolu” çox mürəkkəb və ziddiyyətli prosesdir. Burada səhv atılan addım sərsəm millətçi mif yaradıcılığına, tarixi saxtalaşdırmaq və yenidən yazmaq, başqasının mədəni irsini özününküləşdirmək cəhdlərinə gətirib çıxara bilər. Bununla bərabər, Qələbə gələcək qarşısında məsuliyyətlə bağlı daha yüksək tələblər irəli sürür. Əminik ki, bizim şanlı qələbəmiz, mədəniyyətimiz və tariximiz inkişaf üçün zəmin, sosial rekonstruksiya zonası olacaq. Bu gözəl Qələbə münasibətilə hamınızı təbrik edirik. Verdiyimiz qurbanların qanı yerdə qalmayacaq! Qarabağ Azərbaycandır!”
Bölmənin digər xəbərləri
