Milli Dram Teatrı “Sənsiz” tamaşasının premyerasına hazırlaşır
Bakı, 30 sentyabr, AZƏRTAC
Azərbaycan Dövlət Akademik Milli Dram Teatrında yazıçı-dramaturq, dövlət xadimi Şıxəli Qurbanovun “Sənsiz” əsəri əsasında hazırlanan eyniadlı tamaşanın məşqlərinə başlanılıb.
Bu barədə AZƏRTAC-ın sorğusuna cavab olaraq sənət ocağının mətbuat katibi Cavid Zeynallı bildirib.
Mətbuat katibi söyləyib ki, Xalq artisti, görkəmli teatr rejissoru Tofiq Kazımovun 100 illik yubileyinə həsr olunmuş “Sənsiz”lə böyük sənətkarın unudulmaz xatirəsi anılacaq: “Teatrın bədii rəhbəri, Əməkdar incəsənət xadimi Mehriban Ələkbərzadə, direktor vəzifəsini icra edən, Əməkdar mədəniyyət işçisi İlham Əsgərov tamaşanın yaradıcı heyəti ilə görüşüb, uğurlar arzu ediblər. Əsərə, eləcə də müəllifin müraciət etdiyi dövrə fərqli və yeni baxış bucağından nəzər salınacaq. 1967-ci ildə Tofiq Kazımovun quruluş verdiyi “Sənsiz” tamaşası dövrünün böyük maraqla qarşılanan səhnə əsərlərindən biri olub. Tamaşanın quruluşçu rejissoru Nihad Qulamzadə, bəstəkarı Vüqar Balayev, rəssamı Vüsal Rəhim, işıq üzrə rəssamı Rafael Həsənov, rejissor assistenti Xanım Həsənova və Könül Kərimovadır. Yeni yaradıcılıq işində Xalq artisti Mehriban Zəki (Sevinc), əməkdar artist Füzuli Hüseynov (Tərlan), aktyorlar İlahə Həsənova (Maral) və Elçin Əfəndi (Fərhad) çıxış edəcəklər. Tamaşanın premyerasının noyabrda olacağı nəzərdə tutulur”.
Bölmənin digər xəbərləri
