Milli standartlaşdırma sisteminin beynəlxalq tələblərə uyğunlaşdırılmasına dair İşçi Qrupun növbəti iclası keçirilib
Bakı, 25 dekabr, AZƏRTAC
Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyi tərəfindən “Milli standartlaşdırma sisteminin beynəlxalq tələblərə uyğunlaşdırılmasına dair 2023-2025-ci illər üçün Dövlət Proqramı” üzrə Tədbirlər Planında nəzərdə tutulan tədbirlərin icrası məqsədilə ilin yekunlarına dair onlayn iclas keçirilib.
Dövlət Agentliyindən AZƏRTAC-a bildirilib ki, iclasda milli texniki reqlamentlərin hazırlanmasına məsul olan Energetika Nazirliyi, Fövqəladə Hallar Nazirliyi, Rəqəmsal İnkişaf və Nəqliyyat Nazirliyi, Kənd Təsərrüfatı Nazirliyi, Səhiyyə Nazirliyi, Əmək və Əhalinin Sosial Müdafiəsi Nazirliyi, Ekologiya və Təbii Sərvətlər Nazirliyi, o cümlədən “Azərbaycan Dəmir Yolları” QSC və Azərbaycan Avtomobil Yolları Dövlət Agentliyinin nümayəndələri iştirak ediblər.
Görüşdə agentlik sədrinin müşaviri İlqar Həsənov, Standartlaşdırma, texniki tənzimləmə və sertifikatlaşdırma şöbəsinin müdiri Elməddin Quluyev, həmçinin müvafiq dövlət orqanları nümayəndələrinin çıxışları dinlənilib. Çıxışlar zamanı Dövlət Proqramından irəli gələn texniki reqlamentlərin və istinad standartlarının qəbuluna dair 2025-ci il üzrə iş planında nəzərdə tutulmuş tapşırıqların, o cümlədən müxtəlif dövlət orqanları tərəfindən hazırlanmış milli texniki reqlament layihələrinin icra statusu barədə məlumatlar diqqətə çatdırılıb. Eyni zamanda bu layihələrin hazırlanması və həyata keçirilməsi prosesində qarşıya çıxan çətinliklər ətrafında müzakirələr aparılıb.
Bundan əlavə, cari ildə agentlik və Azərbaycan Respublikasının Kiçik və Orta Biznesin İnkişafı Agentliyinin birgə təşkilatçılığı ilə milli texniki reqlament layihələrinə dair keçirilmiş ictimai dinləmə və müzakirələrdən bəhs olunub. Bildirilib ki, daha əvvəl agentliyin rəsmi internet səhifəsi üzərindən texniki reqlament layihələri ilə bağlı maraqlı tərəflərin rəy və təklifləri alınaraq mütəmadi şəkildə aidiyyəti dövlət orqanlarına təqdim edilib.
Qeyd edək ki, İş Planına uyğun olaraq səlahiyyətli dövlət orqanları tərəfindən müxtəlif mal kateqoriyalarının təhlükəsizliyinə dair ümumilikdə 43 milli texniki reqlament layihəsi hazırlanıb. Sözügedən reqlamentlər ilkin mərhələdə əhali tərəfindən geniş istehlak olunan yuyucu vasitələri, ətriyyat-kosmetika, yanacaq və yüngül sənaye məhsulları, tikinti materialları, tütün, elektrotexnika və radioelektronika məmulatları, uşaq oyuncaqları, uşaqlar və yeniyetmələr üçün nəzərdə tutulmuş məhsullar, mebel və digər qeyri-qida istehlak mallarını əhatə edir.
“Milli standartlaşdırma sisteminin beynəlxalq tələblərə uyğunlaşdırılmasına dair 2023–2025-ci illər üçün Dövlət Proqramı” Azərbaycan Respublikası Prezidentinin 2023-cü il 23 yanvar tarixli 3721 nömrəli Sərəncamı ilə təsdiq olunub. Sözügedən Dövlət Proqramında nəzərdə tutulmuş tədbirlərin icrası üzrə əlaqələndirici qurum qismində Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyi müəyyən edilib.
Bölmənin digər xəbərləri
