Bakı, 26 fevral, AZƏRTAC

Fevralın 26-da Milli Təhlükəsizlik Nazirliyinin Heydər Əliyev adına Akademiyasında Xocalı soyqırımının 23-cü ildönümünə həsr olunmuş anım mərasimi keçirilib.

MTN-in ictimai əlaqələr idarəsindən AZƏRTAC-a bildiriblər ki, əvvəlcə tədbir iştirakçıları Akademiyanın akt zalının foyesində Xocalı faciəsini əks etdirən fotosərgi ilə tanış olublar. Anım tədbiri açıq elan edildikdən sonra soyqırımı qurbanlarının xatirəsi bir dəqiqəlik sükutla yad olunub və dövlət himni səsləndirilib.

Akademiya rəisinin müavini, general-mayor İsgəndər Allahverdiyev bəşər tarixində qanlı və dəhşətli faciələrdən biri olan Xocalı soyqırımına həsr olunmuş tədbirdə çıxışına xalqımızın ümummilli lideri Heydər Əliyevin aşağıdakı sözləri ilə başlayıb: “Xocalı soyqırımı, ermənilərin xalqımıza qarşı təcavüzü, vəhşiliyi, insana qarşı ən rəzil üsullardan istifadə etməsi bəşəriyyət tarixinə daxil olub və olacaqdır. O gecə, o günlər həlak olanlar, dünyadan gedənlər Azərbaycanın əziz vətəndaşlarıdır, onlar respublikamızın ərazi bütövlüyü yolunun, xalqımızın milli azadlıq uğrunda apardığı müharibənin qurbanlarıdır, şəhidləridir. Bu qəddar və amansız soyqırımı aktı insanlıq tarixinə ən dəhşətli kütləvi terror aktlarından biri kimi daxil oldu”.

Diqqətə çatdırılıb ki, əsrlərdən bəri monoetnik, “böyük Ermənistan” yaratmaq kimi sərsəm iddia ilə yaşayan ermənilər Azərbaycan torpaqlarına sahib olmaq, öz məkrli niyyətlərini həyata keçirmək üçün dəridən-qabıqdan çıxıb, tarixdə görünməmiş cinayət və vəhşiliklərə, kütləvi qırğınlara, vandalizmə əl atıblar. Qonşu olduqları dövlətlərin torpaqlarına göz dikmək erməni xislətinə xas olan ən əsas xüsusiyyətlərdən biridir. Erməni millətçiləri öz mənfur niyyətlərinə çatmaq üçün daim əlverişli məqamlardan istifadə edib, hər dəfə bölgədə ictimai-siyasi durum dəyişən kimi daha da fəallaşaraq fitnə-fəsad törədiblər.

General-mayor İ.Allahverdiyev bildirib ki, tarixdə erməni xəyanəti və vəhşiliyi nəticəsində çoxlu sayda dəhşətli və qanlı faciələr baş verib. 1804-cü ildə Gəncə, 1827-ci ildə İrəvan şəhərlərinin rus qoşunları tərəfindən işğalında, 1911-ci ildə Cənubi Azərbaycandakı xalq azadlıq hərəkatının boğulmasında, 1920-ci ildə Azərbaycan Xalq Cümhuriyyətinin süqutunda, həmin ilin mayında Gəncədəki böyük xalq üsyanının yatırılmasında erməni fitnəkarlığı həlledici rol oynayıb. 1918-1920-ci illərdəki Zəngəzur, İrəvan, Göyçə, Şamaxı, Quba, Urmiya qırğınları tariximizin ən qanlı səhifələrindəndir. Onu demək kifayətdir ki, 1918-ci il martın son üç günü ərzində ermənilər tərəfindən Bakıda törədilən qırğınlarda minlərlə azərbaycanlının həyatına son qoyulub.

İndiki Ermənistan ərazisinin azərbaycanlılardan təmizlənməsi başa çatdıqdan sonra Azərbaycanın əzəli və tarixi ərazisi olan Dağlıq Qarabağın Ermənistana ilhaq edilməsi üçün fəal döyüş əməliyyatlarına başlandı. Azərbaycanın şəhər və kəndlərində terror və təxribat aktları törədilir, Dağlıq Qarabağın, ölkəmizin Ermənistanla həmsərhəd rayonlarının dinc azərbaycanlı əhalisi arası kəsilməyən silahlı basqınlara məruz qalırdı. Cəzasızlıq, himayədarların köməkliyi erməniləri daha da azğınlaşdırırdı. Artıq onlar ən vəhşi əməlləri törətməyə hazır idilər.

Qeyd edilib ki, həmin dövrdə Azərbaycanda daxili ictimai-siyasi vəziyyət də olduqca gərginləşmişdi. Ovaxtkı hakimiyyətin naşılığı, bacarıqsızlığı və iradəsizliyi nəticəsində Milli Ordunun yaradılması işi ləngiyirdi. Bunun nəticəsidir ki, 1992-ci ilin başlanğıcında Azərbaycan Silahlı Qüvvələri Milli Ordunun tam silahlanmamış bir neçə taborundan, Daxili İşlər, Milli Təhlükəsizlik nazirlikləri, Xüsusi təyinatlı milis dəstələrinin bölmələrindən, pis silahlanmış və yaxşı təlim keçməmiş, vahid komandanlığı olmayan yerli özünümüdafiə qüvvələrindən və müxtəlif partiyaların könüllülərindən təşkil edilmiş dəstələrdən ibarət idi. Müqayisə üçün qeyd etmək yerinə düşərdi ki, erməni silahlı dəstələrindəki təkcə muzdluların sayı azərbaycanlı döyüşçülərdən çox olmaqla yanaşı, onlar həm də daha yaxşı təşkil olunmuş, silahlanmış və təlim keçmişdilər. Sovet silahlı qüvvələrinin 366-cı motoatıcı alayı da açıq-aşkar ermənilərin tərəfində idi. Bu alayın əksər zabiti və giziri milliyyətcə erməni idi.

Vurğulanıb ki, 1992-ci il fevralın 25-dən 26-na keçən gecə təcavüzkar Ermənistan Respublikasının silahlı qüvvələri, Azərbaycan Respublikasının Dağlıq Qarabağ bölgəsindəki erməni terrorçu-separatçı dəstələri ilə, Rusiyanın 366-cı motoatıcı alayının köməyi ilə Xocalı şəhərinə hücum edərək təkcə azərbaycanlılara qarşı deyil, bütün türk-müsəlman dünyasına, bəşəriyyətə və insanlığa qarşı müdhiş bir cinayəti - Xocalı soyqırımını törətdilər. Bir günün içində 613 soydaşımız soyqırımının qurbanı oldu. Vəhşiliklə qətlə yetirilənlərin arasında 63-ü uşaq, 106-sı qadın, 70-i isə qoca idi. 8 ailə tamamilə məhv edildi, 25 uşaq hər iki valideynini, 130 uşaq valideynlərindən birini itirdi. Yaralanan 487 nəfərdən 76-sı uşaq idi. 1275 xocalılı əsir, 150 nəfəri isə itkin düşdü.

Xocalı soyqırımından sonra erməni vəhşiliyi, vandalizmi və azğınlığı getdikcə daha da şiddətlənirdi. Nəticədə Azərbaycan Respublikası ərazisinin 20 faizi işğal edilib. Erməni təcavüzkarları işğal olunmuş ərazilərdə Azərbaycan xalqının mədəni-tarixi irsini xüsusi qəddarlıqla məhv ediblər.

İ.Allahverdiyev bildirib ki, Azərbaycan xalqının ümummilli lideri Heydər Əliyev hakimiyyətə qayıtdıqdan sonra erməni millətçilərinin azğın təbliğat kampaniyasına qarşı məqsədyönlü və ardıcıl tədbirlər görülməsinə başlanıb. “Azərbaycanlıların soyqırımı haqqında” Azərbaycan Respublikası Prezidentinin 1998-ci il 26 mart tarixli Fərmanı tarixi həqiqətlərin üzə çıxmasına və öz yerini tutmasına təkan verib. Tariximizdə ilk dəfə olaraq azərbaycanlılara qarşı törədilmiş kütləvi qırğınlar, soyqırımı rəsmən məhz bu mühüm sənəddə bəyan edilib, Cənubi Qafqazda Azərbaycan xalqı əleyhinə aparılmış etnik təmizləmə siyasətinin kökləri açıqlanıb. Fərmana əsasən 31 mart günü son yüz ildən artıq dövrdə erməni millətçilərinin xalqımıza qarşı törətdikləri vəhşiliklərin qurbanı olmuş günahsız insanların xatirəsinə ehtiram əlaməti olaraq azərbaycanlıların soyqırımı günü elan edilib.

Xocalı soyqırımı elə azğın və dəhşətli formada törədilib ki, bəşər övladı özünün bütün tarixi ərzində belə vəhşilik və qəddarlıq nümunələrini az-az görüb. Hüquqi xarakterinə və səciyyəvi xüsusiyyətlərinə görə Xocalı faciəsi beynəlxalq hüquq münasibətlərinə qəsd edən, bəşəriyyət əleyhinə yönələn dəhşətli insan qırğını, bütöv bir xalqa, azərbaycanlılara qarşı törədilmiş soyqırımıdır.

Qeyd olunub ki, ümummilli lider Heydər Əliyevin erməni təcavüzkarlarına qarşı mübarizəsi Ulu Öndərin layiqli davamçısı Azərbaycan Respublikasının Prezidenti İlham Əliyev tərəfindən qətiyyətlə davam etdirilir. Artıq bu mübarizə bütün dövlət qurumları, ictimai təşkilatlar, alimlər, yazıçılar tərəfindən mərkəzləşdirilmiş qaydada, beynəlxalq siyasi və humanitar təşkilatların dəstək və imkanlarından istifadə olunmaqla həyata keçirilir.

Sonda İ.Allahverdiyev bildirib ki, müdrik xalqımızın yaddaşından Xocalı soyqırımı heç vaxt silinməyəcəkdir. Millətimiz öz şəhidlərinin qanını, günahsız qurbanları, körpələrin göz yaşlarını unutmayıb. Bu vəhşiliklərin yaddaşlardan silinməsi mümkünsüzdür. Azərbaycan xalqı ermənilərin insanlığa nifrət siyasəti ilə heç bir zaman barışmayacaq, güclü, cəsur, yüksək mənəviyyatlı və əqidəli Azərbaycan əsgəri torpaqlarımızı mənfur işğalçılardan təmizləyəcək, tarixi ədalət bərpa olacaq.

Akademiyanın dinləyicisi leytenant S.Ələkbərov, kursantları E.Hacıyev və İ.Cəlilov tədbirdə çıxış edərək Azərbaycanın müstəqilliyinin daha da möhkəmləndirilməsi və əbədi olması uğrunda yorulmaq bilmədən çalışacaqlarına, ölkəmizin bütün gəncləri kimi, Vətənin müstəqilliyi, ərazi bütövlüyü uğrunda Prezident İlham Əliyevin ətrafında bundan sonra da sıx birləşəcəklərinə, dövlətçiliyimizin möhkəmlənməsi üçün səylərini əsirgəməyəcəklərini və Ali Baş Komandanın hər bir əmrini dərhal və qüsursuz yerinə yetirəcəklərini bildiriblər.

Tədbirin sonunda “Məhv edilmiş şəhər - Xocalı faciəsi” adlı sənədli film nümayiş etdirilib.