Milli Xalça Muzeyində “Qənirə Paşayeva-İTHAF” bədii sərgisinin açılış mərasimi keçirilib
Bakı, 25 sentyabr, AZƏRTAC
Bu gün Azərbaycan Milli Xalça Muzeyində tanınmış ictimai xadim və jurnalist, VI çağırış Azərbaycan Respublikası Milli Məclisinin deputatı, parlamentin Mədəniyyət komitəsinin sədri Qənirə Paşayevanın unudulmaz xatirəsinə həsr olunmuş “Qənirə Paşayeva - İTHAF” adlı bədii sərginin açılışı olub.
AZƏRTAC xəbər verir ki, sərgidə əvvəlcə iştirakçılara Qənirə Paşayeva ilə bağlı müvafiq kataloq təqdim olunub.
Tədbirin açılış mərasiminin aparıcısı, şair-publisist Əkbər Qoşalı sərgidə Azərbaycan Rəssamlar İttifaqının (ARİ) üzvü olan yeddi tanınmış rəssamın əsərlərinin nümayiş olunduğunu diqqətə çatdırıb.
Tədbir Milli Məclisin Mədəniyyət komitəsi, Rəssamlar İttifaqı və “HüsnART” Müstəqil Sənət Ocağının təşkilatçılığı, Mədəniyyət Nazirliyi və Milli Xalça Muzeyinin dəstəyi ilə reallaşıb. Xalq rəssamları Arif Hüseynov, Sirus Mirzəzadə, Əməkdar rəssam, deputat Ülviyyə Həmzəyeva, ARİ-nin üzvləri “Bakı” qalereyasının direktoru Eldəniz Babayev, Fikrət İbrahimli, Gülxan Bəydəmir və Yusif Mirzə Qənirə Paşayevanın həyatı və yaradıcı fəaliyyətinə müraciət edərək təkrarsız sənət əsərləri ilə sərgiyə qatılıblar.
Yeddinci çağırış Milli Məclisin deputatı Polad Bülbüloğlu qeyd edib ki, Qənirə Paşayeva ilə ilk tanışlığı onun gənc jurnalist olduğu dövrlərə təsadüf edir. Polad Bülbüloğlunun sözlərinə görə, onun istedadı, Vətəninə böyük sevgisi hələ o vaxtlardan duyulurdu. “Qənirə Paşayevanın reportajları, hazırladığı materiallar həmişə son dərəcə obyektiv olub. Təəssüf ki, Qənirə xanım aramızdan çox erkən ayrıldı. Amma özündən sonra böyük irs qoyub getdi. Onunla son görüşümüz Şuşada oldu. Bülbülün ev-muzeyindəki tədbirdə iştirak üçün təşrif buyurmuşdu. O günü heç vaxt unutmayacağam”, - deyə o bildirib.
Türkiyə Cümhuriyyətinin Azərbaycandakı səfirliyinin müşaviri Muhiddin Məcid Qənirə Paşayevanın bütün Türk dünyası üçün dəyərli şəxsiyyət olduğunu vurğulayıb. “Qənirə Paşayeva bizim nəzərimizdə dəyərli mədəniyyət, siyasət adamı, ictimai xadim olmaqla yanaşı, müasir dövrdə Türk dünyası dedikdə ilk ağla gələn insanlardan biridir. O, bir insanın həyatına sığmayan işlər görüb. Şuşa deyəndə Qənirə xanımın gözləri yaşarırdı”,- deyə əlavə edib.
Milli Məclisin İctimai birliklər və dini qurumlar komitəsinin sədri Fazil Mustafa, ARİ-nin sədri, Xalq rəssamı Fərhad Xəlilov sərgini bir vəfa borcu olmaqla yanaşı, sənət hadisəsi kimi xarakterizə edib, yeni əsərlərin məziyyətlərindən söz açıb.
Kərkük Kültür Mərkəzinin rəhbəri Şəmsəddin Kuzəçi, Əməkdar elm xadimi Qəzənfər Paşayev ürək sözlərini bölüşüb. Onlar Qənirə Paşayevanı sənətə, sənətkara xeyirxah münasibətilə seçilən ictimai xadim və Turan sevdalısı olaraq xarakterizə edib.
Qənirə Paşayevanın mənəvi zənginliyi barədə danışan Xalq şairi Sabir Rüstəmxanlı söyləyib: “Qənirə xanım komitə sədrliyi dövründə yeni ənənə ilə incəsənət xadimlərinin yubileylərini təbrik edirdi, onların fəaliyyətlərinə yenidən nəzər salırdı, icitimailəşdirirdi. O, son dərəcə həssas insan idi. Qənirə xanım millətimizin ən gözəl xüsusiyyətlərini özündə cəmləşdirmişdi. Bu mənada, o, Azərbaycan xanımı adına nümunə idi”.
Xalq rəssamı Arif Hüseynov Qənirə Paşayeva ilə yaradıcı əməkdaşlığından söz açıb.
Arif Hüseynov Qənirə Paşayevanın ailəsinə xatirə hədiyyəsi olaraq üstünə özəl miniatürlər işlənmiş saz təqdim edib.
Qənirə Paşayevanın bacısı Kəmalə Paşayeva ailə adından sərginin iştirakçısı olan rəssamlara, təşkilatçı qurumlara, sərginin təşkilində əməyi olan hər kəsə təşəkkür edib.
Daha sonra qonaqlar əsərlərlə tanış olublar. Sərgi sentyabrın 30-dək davam edəcək.
Bölmənin digər xəbərləri
