Bakı, 26 sentyabr, AZƏRTAC

Vətən müharibəsinin başa çatmasından üç aydan bir qədər artıq vaxt keçmişdi. Qoyunları yaxın qonşumla birlikdə bizim kəndlə Talış kəndi arasında “Qisas” postu adlanan ərazidə kövşənə buraxmışdıq. Haradasa axşam saat 5-ə işləyirdi. Qoyunlara yaxınlaşıb onları kövşənin başqa səmtinə yönəltmək istəyirdim. Elə bu dəm qəfil eşitdiyim partlayışdan huşum başımdan çıxdı...

AZƏRTAC xəbər verir ki, bunu Tərtərin Borsunlu kənd sakini Niyaməddin Verdiyev deyib.

O, 2021-ci il fevralın 21-də baş verən hadisəni xatırlayaraq bildirib: “Mənimlə birlikdə qoyun otaran həmkəndlim partlayış səsinə gələrək yardım göstərməyə çalışıb. Ondan sonra nə baş verdiyini, nələr olduğunu xatırlamıram. Dəhşətli ağrılardan huşumu itirmişdim...”.

O vaxt rayondakı subartezian quyuları idarəsində işləyən 47 yaşlı Niyaməddin Verdiyev piyada əleyhinə minaya düşəndən sonra çox dəhşətli ağrılara məruz qalıb. Partlayışdan sonra dizdən yuxarı sağ ayağını itirib. İndiyədək 2 dəfə Bərdədə, bir dəfə Gəncədə, 2 dəfə isə Milli Təhlükəsizlik Nazirliyinin hospitalında əməliyyat olunub. Üç ay bundan əvvəl isə Yevlax şəhərində onu altıncı dəfə əməliyyat masasına çıxarıblar. Lakin çoxsaylı əməliyyat və müalicələrə baxmayaraq, ağrılardan xilas ola bilmir.

Partlayışdan sonra o, əmək qabiliyyətini itirib, qoltuq ağaclarının köməyi ilə hərəkət edir, 2-ci qrup əlildir. Mina qurbanı olan Niyaməddin vətənpərvər övladlar böyüdüb. Ötən ilin payızında böyük oğlu Qorxmaz hərbi xidmətini başa vuraraq geri qayıdıb. Hazırda hərbi xidmətdə olan digər oğlu Orxan lokal antiterror tədbirləri zamanı Xocavənddə qolundan, qıçından və başından yaralanıb. Tibbi yardım göstərilmək üçün onu Göyçay rayonuna aparıblar.

Öz evinin içində doğma kəndin ətrafında terror qurbanı olmaq dəhşətli şeydir. Bir var bu, müharibə şəraitində, döyüş əməliyyatı zamanı ola, bir də var ki, dinc şəraitdə. “Dinc şəraitdə bunun baş verməsi sakinlərin səksəkəli yaşaması, daim təhlükə ilə üz-üzə qalması deməkdir. Ona görə də erməni terrorçularının torpağa basdırdığı minaların xəritələri beynəlxalq hüququn tələbləri ilə əldə edilməli və terrorçular bu vəhşi əməllərinə görə qanun qarşısında cavab verməlidirlər. Çünki zərərsizləşdirilməyən hər mina potensial təhlükə, yarıda qırılan ömür və yaxud kiminsə yarımcan olması deməkdir. Bunun baş verməməsi və daha böyük fəlakətlərdən uzaq olmaq üçün mina xəritələri əldə edilməli və torpağımızdan erməni terrorunun izləri tamamilə təmizlənməlidir”.