REGİONLAR
Mingəçevir Dövlət Universitetində “Məzun günü – 2020” keçirilib
![](/files/galleryphoto/2020/2/1200x630/15934481582283737686_1200x630.jpg)
![](/files/galleryphoto/2020/2/1200x630/15934481582266965473_1200x630.jpg)
![](/files/galleryphoto/2020/2/1200x630/1593448158975864129_1200x630.jpg)
![](/files/galleryphoto/2020/2/1200x630/15934481582386962222_1200x630.jpg)
![](/files/galleryphoto/2020/2/1200x630/15934481584797613057_1200x630.jpg)
![](/files/galleryphoto/2020/2/1200x630/15934481582893941428_1200x630.jpg)
![](/files/galleryphoto/2020/2/1200x630/15934481585149315466_1200x630.jpg)
![](/files/galleryphoto/2020/2/1200x630/1593448158759839902_1200x630.jpg)
Bakı, 29 iyun, AZƏRTAC
İyunun 29-da Mingəçevir Dövlət Universitetində (MDU) “Məzun günü - 2020” tədbiri keçirilib. “Zoom” platforması üzərindən onlayn formatda təşkil olunan tədbirdə cari tədris ilində MDU-dan məzun olan tələbə və magistrantlar, eləcə də valideynlər və universitetin əməkdaşları iştirak ediblər.
Universitetdən AZƏRTAC-a bildiriblər ki, “Məzun günü - 2020”də çıxış edən MDU-nun rektoru Şahin Bayramov 2019/2020-ci tədris ilində bakalavriat və magistratura səviyyələri üzrə ümumilikdə 450-yə yaxın gəncin universitetdən məzun olduğunu bildirib, bütün məzunlara, onların müəllimlərinə və valideynlərinə səmimi təbriklərini çatdırıb.
Təhsil aldıqları müddətdə MDU ailəsinin üzvünə çevrilən tələbələrin bundan sonra həmin ailədə məzun statusunda təmsil olunacaqlarını qeyd edən rektor ali təhsil ocağının professor-müəllim heyəti, tələbələr, magistrantlar və məzunlar üçün ortaq dəyər olduğunu vurğulayıb.
Ş.Bayramov builki məzunların universiteti innovasiyaların rolunun kəskin artdığı, dördüncü sənaye inqilabının başlandığı, süni intellektin sürətlə inkişaf etdiyi və rəqəmsal texnologiyaların həyatımıza güclü nüfuz etdiyi bir dövrdə bitirdiklərini bildirib. Rektor gənclərin doğma Azərbaycanımızın davamlı inkişaf etdiyi, ölkəmizdə insan kapitalının əhəmiyyətinin sürətlə artdığı və post-neft dövrünün reallıqlarından irəli gələn çağırışların gücləndiyi bir dövrdə universitet məzunu olduqlarını da vurğulayıb.
MDU-da əldə etdikləri biliklər, ələ etdikləri bacarıqlar və topladıqları təcrübə sayəsində məzunların yeni dövrün tələblərinə uyğun yüksəkixtisaslı mütəxəssis kimi formalaşdıqlarını qeyd edən rektor onlara gələcək həyatlarında və karyeralarında uğurlar arzulayıb.
Tədbirdə Azərbaycan Respublikası Təhsil nazirinin müavini Firudin Qurbanovun, Mingəçevir Şəhər İcra Hakimiyyətinin başçısı İlham İsmayılovun, Milli Məclisin Elm və təhsil komitəsinin sədri Bəxtiyar Əliyevin, Şamaxı Rayon İcra Hakimiyyətinin başçısı, MDU-nun məzunu Tahir Məmmədovun, Milli Məclisin Mingəçevir şəhərindən olan deputatı Aydın Mirzəzadənin, “Azərbaycan İES” MMC-nin direktoru Təhmasib Hüseynovun, Mingəçevir Regional “ASAN xidmət” mərkəzinin direktoru Elxan Cəfərovun, Mingəçevir şəhər Gənclər və İdman İdarəsinin rəisi Kamal Nəcəflinin, “Mingəçevir Tekstil” MMC-nin direktoru Mehman Hüseynovun, Mingəçevir şəhər Uşaq-Gənclər İnkişaf Mərkəzinin direktoru, MDU-nun İctimai Nəzarət Şurasının üzvü Ədalət Quliyevanın, “Mingəçevir işıqları” qəzetinin baş redaktoru, MDU-nun İctimai Nəzarət Şurasının üzvü Fərman Nəbiyevin, Mingəçevir Gənclər Evi Sosial Xidmət Müəssisəsinin direktoru Tural Kərimlinin, Mingəçevir Yüksək Texnologiyalar Parkı nəzdində “SİMBİOZ” Texnoloji Biznes İnkubatorun koordinatoru Orxan Nadirovun, valideynlərdən Vəfa Hacıyevanın, Sadəddin Cəfərovun və Elşad Hacıyevin MDU məzunlarına videotəbrikləri nümayiş etdirilib. Təbriklərdə müəllim, iqtisadçı və mühəndis kimi fəaliyyət göstərəcək MDU məzunlarının cəmiyyətimizə faydalı mütəxəssis və xalqımıza layiqli vətəndaş olacaqlarına əminlik ifadə edilib.
Sonra çıxış edən məzunlar Kəmalə Hacıyeva, Məhəmməd Kərimov, Elsəvər Cəfərov, Günel Məmmədova və Könül Aydın MDU-nu bitirməkdən qürur duyduqlarını, müasirləşən doğma universitetlərini layiqincə təmsil etməyə çalışacaqlarını və onların üzərində böyük əməkləri olan müəllimlərinə daim minnətdar olacaqlarını bildiriblər.
Daha sonra təhsil müddətində yüksək akademik göstəricilər əldə etmiş və MDU-nun ictimai həyatında fəal rol oynamış bir qrup məzunun universitetin fəxri fərmanı ilə təltif olunması barədə rektorun müvafiq əmri oxunub.
Sonda məzunların MDU haqqında təəssüratlarını əks etdirən videoçarxlar və universitetin tələbələri tərəfindən məzunları təbrik məqsədilə hazırlanmış videomusiqilər nümayiş etdirilib. MDU-dan məzun olan Bağdagül Baliyeva və İranə Budulovanın iştirakı ilə çəkilmiş “MDU Məzunu 2020” klipi tədbir iştirakçıları tərəfindən böyük maraqla qarşılanıb.