REGİONLAR
Mingəçevir teatrı yanvarda tamaşaçılara iki tamaşa təqdim edəcək
Daşkəsən, 8 yanvar, Vüsalə Cənnətova, AZƏRTAC
Mingəçevir Dövlət Dram Teatrı yanvar ayında tamaşaçıları üçün iki səhnə əsəri təqdim edəcək.
Teatrın direktoru, Əməkdar artist İntiqam Soltanın AZƏRTAC-ın bölgə müxbirinə verdiyi məlumata görə, yanvarın 20-də teatrsevərlər Bakı Uşaq və Gənclər Teatrı ilə birlikdə səhnələşdirilən “Vətən” adlı tamaşanı izləyə biləcəklər. Səhnə əsəri Azərbaycan Respublikasının dövlət rəmzlərinə həsr olunub. Ayın sonu isə Mingəçevir Dövlət Dram Teatrında Qriqoriy Qorinin “Herostratı unudun” əsəri səhnələşdiriləcək. Quruluşçu rejissoru Emin Mirabdullayev olan tamaşada rolları Xalq artisti Ella Yaqubova, Elvin Əkbərli, Amil Fərzəliyev, Turqut Məsimli, Paşa Salmanov, Asim Əmirov, Nargilə Abdullayeva, Lalə Abuşova, Vüsalə Quliyeva ifa edəcəklər. Hazırda hər iki səhnə əsərinin məşqləri davam edir.
Fevral ayında isə teatrda daha öncə nümayiş etdirilmiş iki tamaşa yenidən təqdim olunacaq. Ekologiyanın qorunmasının vacibliyinə diqqət çəkən “Ağ-qara” tamaşası, eləcə də Sahib İbrahimlinin “Sadığın toyu” pyesi əsasında hazırlanan səhnə əsərinin quruluşçu rejissoru Əməkdar artist İntiqam Soltandır.
Bölmənin digər xəbərləri
