Mingəçevirdə Xocalı faciəsinin 19-cu ildönümü ilə bağlı silsilə tədbirlər keçiriləcəkdir
Mingəçevir, 15 fevral (AZƏRTAC). Xalqımızın qan yaddaşına əbədi həkk olunmuş Xocalı faciəsinin 19-cu ildönümü ilə bağlı Mingəçevir şəhərində silsilə tədbirlər keçiriləcəkdir. Şəhər icra hakimiyyəti başçısının müvafiq sərəncamı ilə təsdiq edilmiş tədbirlər planına uyğun olaraq, fevralın 20-dən 26-dək idarə, müəssisə və təşkilatlarda, ümumtəhsil, peşə, ali və orta ixtisas məktəblərində elmi konfransların, xatirə gecələrinin, “dəyirmi masa”ların, Xocalı hadisələrinin şahidləri ilə görüşlərin, inşa yazısı və şeir müsabiqələrinin, idmanın müxtəlif növləri üzrə xatirə turnirlərinin təşkil edilməsi nəzərdə tutulur.
Muzey və kitabxanalarda Xocalı faciəsinə həsr olunmuş guşələr yaradılacaq, foto, rəsm və kitab sərgiləri açılacaq, ədəbi-bədii kompozisiyalar nümayiş etdiriləcəkdir. Şəhərin bütün təhsil ocaqlarında faciə ilə bağlı xüsusi dərslər keçiriləcəkdir. Fevralın 26-da Mingəçevir sakinləri “Azərbaycanlıların soyqırımı və deportasiyası” abidəsini və Şəhidlər xiyabanını ziyarət edəcəklər. Bundan əlavə, şəhid ailələrinə maddi yardımlar göstəriləcək, məscidlərdə faciə qurbanlarının ruhuna dualar oxunacaqdır.
Bölmənin digər xəbərləri
