Minskdə MDB-nin Daimi Səlahiyyətli Nümayəndələr Şurasının iclası keçirilib
Minsk, 5 fevral, AZƏRTAC
Fevralın 5-də Minskdə MDB İcraiyyə Komitəsində Birliyin iştirakçısı olan ölkələrin Nizamnamə və digər orqanları yanında Daimi Səlahiyyətli Nümayəndələr Şurasının iclası keçirilib.
Bu barədə AZƏRTAC-a MDB-nin Minskdəki mənzil-qərargahının mətbuat xidmətindən məlumat verilib.
İclas iştirakçıları MDB-nin Xarici İşlər Nazirləri Şurasının (XİNŞ) aprelin 3-də Bişkekdə (Qırğızıstan Respublikası) keçirilməsi nəzərdə tutulan növbəti iclasının gündəliyinin layihəsini tərtib ediblər. Gözlənildiyinə görə, xarici siyasət idarələrinin başçıları 2014-cü ildə XİN-lərarası məsləhətləşmələr Planının həyata keçirilməsini təhlil etmək və cari il üçün planı təsdiq etmək, Xarici Sərhədlərdə Təhlükəsizliyin Möhkəmləndirilməsində Əməkdaşlıq Proqramının layihəsini müzakirə edəcəklər. Fövqəladə hallar barədə xəbərdarlıq və onun ləğv edilməsində əməkdaşlığa, ümumtəhsil məktəblərində pedaqoji işçilərin ixtisaslarının artırılmasına dair sazişlərin ilkin müzakirəsi də nəzərdə tutulur. Həmçinin radiasiya, kimyəvi və bioloji vəziyyətin qiymətləndirilməsinə və nəzarətə dair, idmanın hərbi-tətbiqi növlərinin inkişafı, eləcə də baza təşkilatlarının yaradılması məsələləri müzakirə ediləcək.
MDB İcraiyyə Komitəsinə Birliyin iştirakçı dövlətlərinə XİNŞ-in gündəliyi layihəsini və ona aid materialları göndərmək təklif olunub.
Daimi Səlahiyyətli Nümayəndələr Şurasının üzvlərinə həmçinin MDB Hökumət Başçıları Şurasının mayın 29-da Astanada keçiriləcək növbəti iclasının gündəliyi layihəsinə təkliflər də təqdim edilib. Qərara alınıb ki, sənəd layihəsi qurumun iştirakçısı olan dövlətlərdə əlaqədar nazirliklər və idarələr tərəfindən işlənəcək və mart ayında MDB Hökumət Başçıları Şurasının iclasının gündəliyi layihəsi tərtib olunacaq.
Bundan başqa, iclasda 2014-cü ildə Birliyin sənəd layihələrinin razılaşdırılması üzrə işlərinin yekunu da müzakirə olunub.
İclas iştirakçıları MDB-nin ali orqanlarına təqdim edilən sənəd layihələrinin razılaşdırılmasında qarşıya çıxan problemləri müzakirə ediblər. Şura üzvləri qərara gəliblər ki, iclaslarda Birliyin əlaqədar nazirliklər və idarələrinin səlahiyyətli nümayəndələrinin ekspert qruplarının iştirakının təmin edilməsi üçün tədbirlər görülsün. Öz növbəsində dövlət daxilində sənəd layihələrinin razılaşdırılmasının başa çatıb-çatmaması barədə MDB İcraiyyə Komitəsinin məlumatlandırılması təmin edilsin.
MDB ölkələrinin Xarici İşlər nazirlikləri ilə dövlətlərarası əlaqələrdə operativ formanın, o cümlədən videokonfansların tətbiqi məsələlərinin araşdırılması qərara alınıb.
Daimi Səlahiyyətli Nümayəndələr MDB İcraiyyə Komitəsinin sədri-icraçı katib Sergey Lebedevi bu il martın 29-da Özbəkistan respublikasında keçiriləcək Prezident seçkilərində Birliyin müşahidə missiyasının rəhbərinə namizədliyini razılaşdırıblar.
İclasda Daimi Səlahiyyətli Nümayəndələr Şurasının və MDB İqtisadi Şurası yanında iqtisadi məsələlər Komissiyasının martın 19-da Minskdə keçiriləcək birgə iclasının gündəliyinin layihəsi də müzakirə edilib.
Zeynal Ağazadə
AZƏRTAC-ın xüsusi müxbiri
Minsk
Bölmənin digər xəbərləri
