Bakı,14 avqust, Günel Alıyeva, AZƏRTAC

AZƏRTAC Azərbaycanda könüllülərin fəaliyyətindən bəhs edir. Həmsöhbətimiz “Azərbaycan Gənclərin İnkişaf Hərəkatı” ictimai birliyinin sədri Miri Mirəliyevdir. Miri “Qoru Gənclər” təşkilatının sertifikatını, eləcə də Ümummilli Lider Heydər Əliyevin anadan olmasının 100 illiyinə həsr olunmuş və şəhid ailələrindən olan uşaqlar üçün keçirilən tədbirdə təşkilati dəstəyə görə təşəkkürnamə alıb.

- Könüllülük layihənizi həyata keçirmək ideyası necə yaranıb və qarşınıza hansı məqsədləri qoydunuz?

- Təşkilatımızı yaratmaq ideyası gənclər birliyi yaratmaq istəyən bir neçə gəncin təşəbbüsü sayəsində yaranıb. İlkin məqsəd gənclər arasında mədəniyyəti təşviq etmək idi. Buna görə də təşkilatımızın əsas məqsədi mədəni tədbirlərlə yanaşı, şəxsi inkişaf və idmanla bağlı tədbirlər təşkil etməkdir.

Müxtəlif xadimlərlə görüşlər və tədbirlər keçirməyi ehtiva edən bir plan hazırladıq. Uğurlu startdan sonra təşkilatı rəsmi qeydiyyatdan keçirməyə qərar verdik. Gənclər və idman naziri Fərid Qayıbovun dəstəyi ilə təşkilat dövlət qeydiyyatına alındı və artıq 6 aydır ki, biz öz fəaliyyətimizi rəsmi şəkildə həyata keçiririk. Bu status sayəsində daha genişmiqyaslı tədbirlər keçirə bildik və indi Zəfər Gününə həsr olunmuş tədbirə hazırlaşırıq.

- Layihənizdən hansı qrup insanlar yardım alır və onun mahiyyəti nədən ibarətdir?

- Layihəmiz 15-29 yaş arası məktəblilər, tələbələr və məzunlar üçün nəzərdə tutulub. Narkomaniyaya qarşı mübarizə, erkən nikah, şəxsi gücün inkişafı və sair mövzularda təlim və seminarlar keçiririk. İstirahət fəaliyyəti üçün ofisdə tədbirlər və düşərgələr təşkil edilir. Bəzən bizə yaşlı insanlar da qoşulur. Onlar bizə güclü təsir edirlər.

Bütün tədbirlər, ustad dərsləri, məşğələlər, seminarlar, təlimlər və beynəlxalq layihələr pulsuz keçirilir. Demək olar ki, bütün layihələrimiz ödənişsizdir, ödəniş tələb edənlər isə dövlət tərəfindən maliyyələşdirilir. İştirakçılardan heç bir ianə tələb olunmur.

- Könüllülük fəaliyyətinizdə ən mürəkkəb məsələlər hansılardır?

- Könüllülük fəaliyyəti bizə sevinc bəxş edir və həyatımızın ayrılmaz tərkib hissəsinə çevrilib. Bizim üçün ən mürəkkəb məsələ vətənpərvərlik klubu çərçivəsində şəhid ailələri ilə görüşdür. Bu yaxınlarda M.F.Axundov adına Milli Kitabxanada Kamil Musəvi və Pərvin Abdullayev kimi müharibə veteranları ilə görüş keçirdik. Onların qarşısında çıxış etmək və minnətdarlıq ifadə etmək çox çətindir. Müharibə iştirakçıları və şəhid ailələri ilə qarşılıqlı əlaqədən çətin bir şey yoxdur. Lakin biz işimizi sevgi ilə görürük.

Şəhid ailələrini ziyarət edəndə, kollektivimiz həmişə şəhidlərin portretlərini hazırlayır. Şəhid anasının oğlunun portretinə baxıb ağlamağa başlaması bizim üçün ən çətin andır. Uşaq evlərini ziyarət etmək də asan deyil. Oradakı uşaqlar çox vaxt təmasa təşəbbüs göstərmirlər, lakin onlarla ünsiyyət bağlayanda bizdən ayrılmaq istəmirlər. Belə anlar bizdə güclü emosiyalar oyadır.

- Könüllülük fəaliyyətində sizə hansı resurslar və dəstək təqdim edilir?

- Əsas dəstəyimizi “Gənclər və İnkişaf” ictimai birliyinin sədri Asim Vəliyev və EMEDIA GROUP ictimai birliyinin sədri Elşən Əliyev kimi daha təcrübəli təşkilat və liderlərdən alırıq. Həmçinin gənclər və idman naziri Fərid Qayıbov da bizə xüsusi dəstək verir.

Dəstək qrant müsabiqələri zamanı göstərilir. Bizə tədbirlərin keçirilməsi üçün yerlər təqdim olunur. Əgər böyük bir yerdə tədbir keçirmək istəyiriksə, mərkəzi idarəyə məktub göndəririk, daha sonra onu icra hakimiyyətinə göndərirlər. İcra hakimiyyəti bizə yer ayırır, lazım olanda maliyyə yardımı edir. Məsələn, Zəfər Günü ilə bağlı tədbirlər xeyli maliyyə vəsaiti tələb edir və bu xərclər Gənclər və İdman Nazirliyi tərəfindən ödənilir.

- Layihənizin ən yaddaqalan nailiyyətləri hansılardır?

- Bu günlərdə Asəf Zeynallı adına Bakı Musiqi Kollecində Ümummilli Lider Heydər Əliyevin 100 illiyinə həsr olunmuş “Sən elə bir Zirvəsən” adlı tədbir keçirdik. Tədbirdə ictimai xadimlər və mədəniyyət işçiləri iştirak ediblər. Milli Məclisin deputatları Aydın Mirzəzadə və Vüqar İsgəndərov, eləcə də xalq artistləri Gülyaz Məmmədova və Əli Nurun da iştirakı bizim üçün böyük nailiyyət oldu. Kollecin rektorunun da tədbirə qatılması onu ən yaddaqalan hadisəyə çevirdi.

- Gələcəklə bağlı planlarınız nədən ibarətdir?

- Ən böyük xəyalımız xarici ölkələrdə Azərbaycan mədəniyyəti günləri keçirməkdir. Azərbaycanda istedadlı tələbələr çoxdur, onlarla işləyirik və indi xaricdə mədəni tədbirlər təşkil etmək istəyirik. Biz fəal və məsuliyyətli gənclərin sayəsində bu məqsədə nail olmağa yaxınıq. Gənclərin asudə vaxtlarını səmərəli keçirmələri üçün ekskursiyalar, ustad dərsləri, düşərgələr və əyləncə tədbirləri təşkil etməyə davam edirik. Eyni zamanda, mütəmadi olaraq rəsmi tədbirlər, mədəniyyət xadimləri ilə görüşlər təşkil edirik. Bu yaxınlarda kitablarını gənc könüllülərə bağışlayan, şeirlərini oxuyan Sabir Rüstəmxanlı ilə görüşümüz olub.