MOK: Əsas məqsəd Yeniyetmələrin III Yay Olimpiya Oyunlarında Azərbaycanı layiqincə təmsil etməkdir
Bakı, 29 sentyabr, AZƏRTAC
Oktyabrın 6-da Argentinanın Buenos-Ayres şəhərində 206 ölkədən 32 idman növü üzrə 4000 idmançının iştirakı ilə Yeniyetmələrin III Yay Olimpiya Oyunları start götürəcək. Dörd ildə bir dəfə keçirilən bu oyunlarda ölkəmizi 9 növ üzrə 17 idmançı təmsil edəcək. Komandamızın əsas hissəsi oktyabrın 4-də Buenos-Ayresə yola düşəcək.
AZƏRTAC xəbər verir ki, bu barədə Yeniyetmələrin III Yay Olimpiya Oyunlarında iştirak edəcək Azərbaycan nümayəndə heyətinin rəhbəri, Milli Olimpiya Komitəsinin (MOK) marketinq idarəsinin rəisi Mehman Kərimov məlumat verib. O, yeniyetmələrin əvvəlki oyunlarında yüksək nəticələr qazanmış komandamızın güclü rəqiblərdən sayıldığını və dünyada idman dövləti kimi tanınan Azərbaycanı bu mötəbər oyunlarda da layiqincə təmsil etməyin hazırda qarşıda duran əsas məqsəd olduğunu vurğulayıb.
MOK rəsmisi Buenos-Ayresdə bir sıra yeniliklər tətbiq ediləcəyini bildirərək deyib: “Beynəlxalq Olimpiya Komitəsinin 2014-cü ildə qəbul etdiyi “Olimpiya gündəliyi-2020” ilə əlaqədar qarşıya qoyulan məqsədlərə çatmaq üçün Təşkilat Komitəsi tərəfindən bir sıra tələblər irəli sürülüb. Nümayəndə heyətləri oktyabrın 6-dək Olimpiya kəndində qeydiyyatdan keçərək açılış mərasimində iştirak etməli, yarışlar bitənədək, yəni oktyabrın 18-dək burada qalmalıdırlar”.
Mehman Kərimov qeyd edib ki, Olimpiya kəndində xüsusi mədəniyyət və təhsil proqramları fəaliyyət göstərəcək. Məqsəd yalnız yeniyetmələrin yarışlarda iştirak etməsi deyil, həm də digər iştirakçılarla ünsiyyət qurub dostlaşmaq, müxtəlif mədəniyyətlərlə tanış olmaq, bəşəri dəyərlərə xidmət edən olimpiya ideallarından faydalanmaqdır.
Olimpiadada texnoloji cəhətdən yeniliklər gözlənilir. Bu oyunlarda informasiya kommunikasiya texnologiyasından daha geniş istifadə olunması nəzərdə tutulub. İnsanlar oyunları virtual reallıq rejimdə izləyə biləcəklər.
Olimpiya Oyunları tarixində ilk dəfə iştirakçılar arasında gender bərabərliyinin təmin olunduğunu qeyd edən Azərbaycan nümayəndə heyətinin rəhbəri bildirib ki, budəfəki oyunlarda 4000 iştirakçının 50 faizini qızlar təşkil edəcək. Yığmamızın heyətində yer alan 17 idmançıdan 8-i qızlardır. Bu nüfuzlu yarışda Azərbaycan gimnastika və stolüstü tennis üzrə ilk dəfə təmsil olunacaq.
Mehman Kərimov onu da vurğulayıb ki, belə böyük yarışlarda müəyyən çətinliklər ola bilər: “Xüsusilə yarışlar zamanı nəqliyyat üçün olimpiya zolağının olmaması bir qədər narahatlıq doğurur. Təşkilat Komitəsi vəd edib ki, insanların rahat şəkildə hərəkət etməsi üçün maksimum cəhdlər göstəriləcək. Buenos-Ayresdə nəqliyyatın hərəkəti üçün xüsusi zolaqlar var və oyunlar zamanı bu zolaqlardan istifadə ediləcək. “Nümayəndə heyətimizin bəxti gətirib ki, iştirak edəcəyimiz 9 idman növündən 8-i üzrə yarışlar yollarda xüsusi zolaqların ayrıldığı Olimpiya parkında olacaq”, - deyə Mehman Kərimov əlavə edib.
Xatırladaq ki, yeniyetmələrin Sinqapurda 2010-cu ildə keçirilmiş birinci Yay Olimpiya Oyunlarında yığmamız 8 medal (5 qızıl, 3 gümüş) qazanaraq 11-ci yeri, 2014-cü ildə Çində təşkil olunan ikinci Oyunlarda isə 12 medal (5 qızıl, 6 gümüş və 1 bürünc) əldə edərək 10-cu yeri tutub.
Bölmənin digər xəbərləri
