MOLDOVADA DOĞUMUN SƏVİYYƏSİ AŞAĞI DÜŞÜR
AZƏRTAC-ın İTAR-TASS agentliyindən aldığı xəbərə görə, Moldovada ölümün səviyyəsi doğumdan yenə yüksəkdir. Respublika Milli Statistika Bürosunun (MSB) iyunun 13-də açıqladığı hesabatda bildirilir ki, Dnestryanı bölgə istisna olmaqla, bu il yanvarın 1-nə ölkə əhalisinin sayı 3,3956 milyon nəfər təşkil etmişdir. Ötən il 37,7 min körpə dünyaya gəlmişdir ki, bu da inişilkindən 0,6 min nəfər azdır. Doğumun orta göstəricisi hər 1000 sakinə 10,5 körpə təşkil edir. Ölüm səviyyəsi isə artır. Ötən il respublikada 44,7 min adam dünyasını dəyişmişdir ki, bu da əvvəlki illə müqayisədə 7,3 faiz çoxdur. Ekspertlərin fikrincə, vəziyyətin belə şəkil almasının başlıca səbəbi uğursuz ailələrlə bağlıdır. Ölkədə hər dörd uşaqdan biri nikahdankənar doğulur və hər dördüncü ailədə valideynlərdən biri pul qazanmaq üçün xaricə gedir.
MSB-nin məlumatına əsasən, Moldovada əhalinin 61 faizi kəndlərdə yaşayır və burada ölümün səviyyəsi şəhərlə müqayisədə xeyli yuxarıdır.
Bölmənin digər xəbərləri
