Moskva, 2 iyun, AZƏRTAC 

Tanınmış azərbaycanlı rəssam, Azərbaycan Rəssamlar İttifaqının, Beynəlxalq Rəssamlar Konfederasiyasının üzvü, Rusiya Rəssamlıq Akademiyasının fəxri akademiki Abbas Kazımov 60 illik yubileyini Moskva Dövlət Şərq Muzeyində açılan “Rənglərin qafiyəsi” adlı sərgi ilə qeyd edib. Ekspozisiyada müəllifin “Qırmızı və Qara”, “Pirosmaniyə ithaf” və “Xalça üslubunda” seriyasından 100-dək əsəri yer alıb.

Sərgini açan Heydər Əliyev Fondunun Rusiya nümayəndəliyinin humanitar proqramlar şöbəsinin rəhbəri Tamilla Əhmədova yubiley sərgisinin hər bir sənətkarın yaradıcılığında müəyyən mərhələnin yekunu, yeni perspektivlərin müəyyənləşməsi kimi səciyyələndirib, “Rənglərin qafiyəsi” sərgisini bir növ tamaşaçı qarşısında etiraf, onunla dialoq kimi qiymətləndirib. “A.Kazımov Abşeron rəngkarlıq məktəbinin yetirməsidir. Bu cərəyan Azərbaycanda təsviri sənətin inkişafına böyük təkan verib. Açılışına toplaşdığımız sərgidə A.Kazımovun əsərlərinə baxan hər bir tamaşaçı öz musiqisini eşidəcək, öz rəng çalarlarını görə biləcək, Azərbaycan təsviri sənətini bir daha kəşf edəcək”, - deyən Tamilla Əhmədova yubilyara yeni yaradıcılıq uğurları arzulayıb.

Azərbaycanın Rusiyadakı səfirliyinin humanitar məsələlər üzrə müşaviri Vüqar İmaməliyev A.Kazımovun uzun illər Vətəndən kənarda yaşamağına baxmayaraq, Azərbaycanla yaradıcılıq əlaqələrini saxladığını diqqətə çatdırıb. Abbas Kazımovun əsərlərində Azərbaycan ruhunun, Abşeron məktəbi üslubunun daim qırmızı xətlə keçdiyini vurğulayan diplomat “Rənglərin qafiyəsi” sərgisində sanki Şərqlə Qərbin birləşdiyini qeyd edib, azərbaycançılıq ruhunu saxladığına görə rəssama təşəkkürünü bildirib.

“Abbas Kazımov olduqca xeyirxah insandır. Mərhəmət yaradıcı şəxsiyyət üçün çox vacib keyfiyyətdir. Rəssamın xarakterinin bu cəhəti onun rəsmlərində də əksini tapır”, - deyən Azərbaycan Rəssamlar İttifaqının sədri Fərhad Xəlilov qeyd edib ki, Abbas Kazımovun əsərlərinə baxdıqca insanın daxilində saf hisslər oyanır, qəlbi nurla dolur. F.Xəlilov vurğulayıb ki, yubilyar uzun illər Moskvada yaşasa da Azərbaycan rəngkarlıq məktəbinin ənənələrini uğurla davam etdirir, Azərbaycan Rəssamlar İttifaqı ilə əlaqələrini daim qoruyub saxlayır.

Sərginin kuratoru Svetlana Xromçenko Abbas Kazımovun yaradıcılığının Rusiya incəsənəti üçün əvəzsiz olduğunu bildirib. Onun fikrincə, Abbas Kazımov öz yaradıcılığında Azərbaycan, rus və Avropa rəngkarlıq ənənələrini bacarıqla birləşdirməyə nail olub. S.Xromçenko deyib: “A.Kazımovun əsərlərində bənzərsiz Azərbaycan muğamlarında olan improvizasiya sərbəstliyi tamaşaçını heyran etməyə bilməz”.

Rəssam Abbas Kazımov sərginin təşkilinə görə Heydər Əliyev Fondunun Rusiya nümayəndəliyinə və şəxsən Leyla Əliyevaya təşəkkürünü bildirib, ömür və yaradıcılıq yolunu birgə keçdiyi sənət dostları Mircavad Mircavadov, Kamal Əhmədov, Qorxmaz Əfəndiyev və başqalarını ehtiramla yad edib.

Abbas Kazımov haqlı olaraq keçən əsrdə Azərbaycan incəsənətinin bir çox cəhətdən özünəməxsusluğunu müəyyənləşdirən Abşeron rəssamlıq məktəbinin görkəmli nümayəndələrindən biri hesab edilir. O, özündən yaşlı müasirlərindən rəsmin ədəbilikdən və həyat reallığının hərfi təcəssümündən azad olunması tendensiyasını mənimsəyib. Rəssamın əsərlərinin məzmunu, üslub və metodu zaman-zaman xalça ornamentikasının yaradıcı şəkildə yenidən dərki prinsiplərini müəyyənləşdirməyə başlayıb.

A.Kazımov Şərq mədəniyyətini və təsviri incəsənətin klassik məktəbini bir araya gətirən unikal texnikanın müəllifidir. Onun “xalça üslubu” miniatür, xalçaçılıq, tikmə və metal üzərində döymə sənətinin sintezindən ibarətdir. Uşaq vaxtı eşitdiyi nağıllar, Şərq xalçalarının ornamentləri, nənələrin saldığı yorğanlardakı qəribə naxışlar, Azərbaycanın ulduzlu gecələri - bütün bunlar rəssamın əsərlərində əksini tapıb.

Sərgi iyunun 2-dən 19-dək davam edəcək.

Fəridə Abdullayeva

AZƏRTAC-ın xüsusi müxbiri

Moskva