MOSKVADA FƏRMAN SALMANOVUN “MƏN SİYASƏTÇİYƏM” KİTABININ TƏQDİMAT MƏRASİMİ OLMUŞDUR
Sibirə və bütün həyatını həsr etdiyi işə vurğun olan Fərman Salmanov öz kitabında təkcə keçmişdən - yanacaq-energetika kompleksinin görünməmiş yüksəlişinə səbəb olan nəhəng uğurlardan deyil, həm də elmi rəylərin və yanaşmaların qarşıdurmasından söhbət açır. Kitab müəllifin 1955-ci ildən başlayaraq yazdığı gündəliklərindəki xatirələri əsasında qələmə alınmışdır. F.Salmanov Rusiya və dünya geologiyası və yanacaq-energetika siyasətində əsas meyilləri ətraflı təhlil edir, dövlət xadimlərinin maraqlı xarakteristikasını verir, Rusiyanın energetika sahəsində təhlükəsizliyinin qorunması yollarını göstərir.
Təqdimat mərasimində çıxış edən Rusiya və Moskva jurnalistlər ittifaqlarının nümayəndələri, Rusiyanın aparıcı nəşrlərinin baş redaktorları, habelə Azərbaycanın Rusiyadakı səfirliyinin və diasporumuzun təmsilçiləri Fərman Salmanovun həm energetika sahəsinin, həm də kütləvi informasiya vasitələrinin inkişafına xüsusi töhfəsini diqqətə çatdırmışlar. “Rusiya kütləvi informasiya vasitələrinin işində fəal iştirakına görə” ona diplom təqdim edilmişdir.
Xatırladaq ki, Fərman Salmanov geologiya-mineralogiya elmləri doktoru, Rusiya Elmlər Akademiyasının müxbir üzvü, Sosialist Əməyi Qəhrəmanı, Lenin və Qubkin mükafatları laureatıdır. O, əmək fəaliyyətinə Kemerovo vilayətində geoloq kimi başlamışdır. Son illər “İTERA” şirkətinin Direktorlar şurası sədrinin müşaviri və “Yuqansneftqaz”ın Direktorlar şurasının sədridir.
Bölmənin digər xəbərləri
