MOSKVADA HÜSEYN XAN NAXÇIVANSKİ HAQQINDA “ƏLAHƏZRƏTİN GENERAL-ADYUTANTI” KİTABININ TƏQDİMATI OLMUŞDUR
Kitabın müəllifi Beynəlxalq İnformatizasiya Akademiyasının həqiqi üzvü, Rusiya Yazıçılar İttifaqının üzvü, Naxçıvan Dövlət Universitetinin fəxri doktoru, Azərbaycan Yazıçılar Birliyinin fəxri üzvü, professor Rudolf Nikolayeviç İvanovdur. Kitabın əvvəlində o, əsərin çapa hazırlanmasında dəstəyinə görə Heydər Əliyev Fondunun prezidenti, YUNESKO-nun xoşməramlı səfiri, Milli Məclisin deputatı Mehriban xanım Əliyevaya səmimi təşəkkürünü bildirmişdir.
Azərbaycanın Rusiyadakı səfiri Polad Bülbüloğlu təqdimat mərasimini açaraq, xalqımızın görkəmli oğlu haqqında bu dəyərli kitabın ərsəyə gəlməsi üçün çəkdiyi zəhmətə görə R.İvanova ölkəmizin hökuməti adından təşəkkür etmişdir. O, yazıçının yaradıcılığına böyük diqqətlə yanaşaraq, bu sanballı tarixi əsərin nəşrinə kömək göstərmiş Azərbaycanın birinci xanımı Mehriban Əliyevanın rolunu xüsusi vurğulamışdır.
Rudolf İvanov çıxışında bildirmişdir ki, o, Qafqazda doğulmuş, həyata vəsiqəni Bakıda almışdır, buna görə daim günəşli Azərbaycana övladlıq borcunu qaytarmağı arzulamışdır. Yazıçı demişdir: “Hüseyn xan Naxçıvanskinin mənsub olduğu sülalənin dörd nəsli namusla, sədaqətlə və can-başla xidmət edərək, yüksək mənəviyyat və misilsiz qəhrəmanlıq nümunəsi göstərmişdir. Fəxr edirəm ki, Hüseyn xan Naxçıvanski kimi qeyrətli və sadiq bir insanın unudulmuş həyatını canlandıra bilmişəm. Mənim yaradıcılığıma xoş münasibətə görə ölkənizin hökumətinə, səfirliyə, xüsusilə Heydər Əliyev Fondunun prezidenti Mehriban xanım Əliyeva başqa olmaqla Fonda təşəkkürümü bildirmək istərdim”. Yazıçı vurğulamışdır ki, hazırda Cavad xan Naxçıvanski haqqında kitab üzərində işə başlamışdır.
Sonra çıxış edən yazıçı-tarixçi Əbdül Hüseynov, general-mayor, iqtisad elmləri doktoru, professor Yuri Makarıçev, tarixçi və publisist Ramiz Abutalıbov və başqaları ölkəmizin tarixinin obyektiv şəkildə öyrənilməsində əsərin əhəmiyyətini diqqətə çatdırmışlar.
R.İvanov 26 kitabın, o cümlədən Rusiya imperiyasının və Qafqazın tarixi haqqında əsərlərin, habelə 200-dən artıq məqalə və oçerkin müəllifidir. O, İmam Şamil və onun silahdaşı Hacı Murad, qafqazlılardan ibarət məşhur diviziya (Dikaya diviziya), görkəmli dövlət xadimi Maqsud Əlixanov haqqında kitablar yazmışdır. “Bəyazidin müdafiəsi: həqiqət və yalan” povesti də onun qələminin məhsuludur. Həmin əsərdə Rusiya-Türkiyə müharibəsi hadisələri və Bəyazid epopeyasının həqiqi qəhrəmanlarının adları doğru-düzgün əksini tapmışdır.
R.İvanov son tarixi əsəri olan “Əlahəzrətin general-adyutantı” kitabında qəhrəman və fədakar sərkərdə Hüseyn xan Naxçıvanski görkəmli şəxsiyyətlərin əhatəsində, həmin dövrün epoxal hadisələrinin mərkəzində təsvir edilmişdir. H.Naxçıvanski Rusiyanın 20 ordeni, o cümlədən iki Müqəddəs Georgi ordeni, “Cəsurluğa görə” Qızıl silah və 9 xarici ordenlə təltif olunmuşdur.
O, Rusiyada orduda general-adyutant rütbəsinə layiq görülmüş ilk və yeganə müsəlman idi. Böyük knyazlar Mixail Aleksandroviç və Dmitri Pavloviç, gələcək generallar P.Vrangel, A.Denikin, Ukraynanın gələcək getmanı P.Skoropadski və Finlandiyanın Prezidenti K.Mannerheym müxtəlif dövrlərdə Hüseyn xanın komandanlığı altında xidmət etmişlər.
Geniş oxucu kütləsi üçün nəzərdə tutulmuş kitab hərbi tədqiqatçılar, tarixçilər və tələbələr üçün faydalı olacaqdır.
