- Möhtərəm cənab Prezident!

Hörmətli müşavirə iştirakçıları!

Bildiyiniz kimi, Azərbaycanın hərbi sənaye kompleksinin əsası ulu öndərimiz Heydər Əliyev tərəfindən ötən əsrin 70-ci illərində qoyulmuşdur. Ulu öndərin xalqın tələbi və təkidi ilə ikinci dəfə hakimiyyətə qayıdışından sonra 1993-cü ildə Azərbaycanda bütün sahələrdə dirçəliş dövrü başladı və həmin ildə də hərbi sənaye kompleksinin inkişafı məqsədilə Dövlət Xüsusi Maşınqayırma və Konversiya Komitəsi yaradıldı.

Heydər Əliyevin siyasi kursunun davamçısı olaraq dünyada gedən prosesləri və ölkəmizin müharibə şəraitində olması, eləcə də respublikanın müdafiə qüdrətinin möhkəmləndirilməsi və kənardan asılılığının azaldılması məqsədi ilə, cənab Prezident, Sizin tərəfinizdən regionda ilk dəfə olaraq Müdafiə Sənayesi Nazirliyi yaradıldı. Qeyd edim ki, nazirliyin fəaliyyəti ilə əlaqədar xarici dövlətlərin nümayəndələri ilə keçirilən görüşlərdə bu addımı dərindən düşünülmüş və müdrük addım kimi yüksək qiymətləndirirlər. Bu, bizdə qürur hissi doğurur.

Nazirliyin fəaliyyətə başlaması üçün onun Əsasnaməsi, strukturu və işçilərin say həddi tərəfinizdən təsdiq edilmiş və bu sahə ilə bağlı olan bir sıra müəssisələr Müdafiə Sənayesi Nazirliyinin tabeliyinə verilmişdir.

Hazırda nazirliyin strukturunda 5 istehsalat birliyi, 3 idarə, elmi tədqiqat institutu və Milli Aerokosmik Agentliyi fəaliyyət göstərir.

Vəziyyəti aydınlaşdırmaq üçün Dövlət Xüsusi Maşınqayırma və Konversiya Komitəsinin tabeliyində olan müəssisələrin son illərdəki fəaliyyəti təhlil olunmuş və müəyyən edilmişdir ki, müəssisələrin istehsalat sahələrinin balansında olan texnoloji avadanlığın, nəqliyyat vasitələrinin və digər zəruri kommunikasiyaların yarıdan çox hissəsi istismara yararsızdır və mənəvi cəhətdən köhnəlmişdir.

Ümumi istehsal sahələrinin 85 faizi uzun müddət ərzində adi təmir işləri aparılmadığından tam yararsız vəziyyətə düşmüşdür.

Nazirlik yaranana qədər bu sahədə əsas texniki-iqtisadi göstəricilər respublika göstəricilərindən xeyli aşağı səviyyədə olmuşdur.

Respublika üzrə 2005-ci ildə ümumi daxili məhsulun artım tempi 41,8 faiz, işçilərin orta aylıq əmək haqqı 118 manat olduğu halda, bu göstəricilər komitə üzrə müvafiq olaraq 4,0 faiz və 69,6 manat olmuşdur.

Hörmətli cənab Prezident!

Sizin tapşırıq və tövsiyələriniz əsasında Müdafiə Sənayesi Nazirliyinin strukturu formalaşdırılmış, müəssisələrin fəaliyyətini bərpa etmək üçün proqramlar hazırlanmış, nazirlik üzrə prioritet sahələr müəyyən edilmişdir. Müdafiə Nazirliyinin və digər güc strukturlarının müdafiə təyinatlı məmulatlara, o cümlədən atıcı silah və xüsusi təyinatlı məmulatlara, hərbi texnikanın ehtiyat hissələrinə və təmirinə olan tələbatı öyrənilmiş, keçmiş SSRİ dövründə olan əlaqələrin bərpa edilməsi və dünyanın müxtəlif dövlətləri ilə işgüzar əlaqələrin yaradılması üçün tədbirlər görülmüşdür.

Nazirliyin fəaliyyətində maliyyə sabitliyini bərpa etmək üçün sağlamlaşdırma tədbirləri və qanunvericilik bazasının yaradılması məqsədi ilə normativ-hüquqi sənədlər hazırlanmışdır. Eyni zamanda, nazirliyin müəssisələrinin 2008-2011-ci illər üzrə hazırlanmış bərpa proqramlarında 53 obyektin yenidən qurulması nəzərdə tutulmuşdur. Bununla bərabər, Dövlət Müdafiə Sifarişi Proqramının icrasını təmin etmək üçün müvafiq Əsasnamə layihəsi hazırlanmış və onun əsasında 10 illik Dövlət proqramı tərtib edilmişdir.

Dövlət Müdafiə Sifarişi Proqramı çərçivəsində müdafiə təyinatlı məmulatın yaradılması və istehsalı üzrə cari və perspektiv proqramlar tərtib edilmişdir.

Cənab Prezident! Sizin tapşırığınıza əsasən sahədə sağlamlaşdırma tədbirləri çərçivəsində Baş nazir cənab Artur Rasizadənin yanında aidiyyəti nazirliklərin rəhbərləri ilə bu proqram müzakirə edilmiş, razılaşdırılmış və fərman layihəsi, eləcə də Dövlət Müdafiə Sifarişi haqqında Əsasnamə təsdiq üçün Sizə təqdim edilmişdir.

Bu sənədlərin təsdiqi nazirliyin qarşısında qoyulmuş vəzifələrin icrası üçün mühüm əhəmiyyət kəsb edir.

Nazirlik fəaliyyətə başladığı dövrdən 212 adda müdafiə təyinatlı məmulatın istehsalı, 32 adda müdafiə təyinatlı məmulatın yaradılması üçün təcrübi-konstruktor işlərinin aparılması, 175 adda isə mülki təyinatlı məmulatın istehsalı həyata keçirilmişdir.

Azərbaycanın tarixində ilk dəfə olaraq 2007-ci ildə respublikanın nazirliklərinin sifarişi ilə nazirliyin müəssisələrində 29 adda silahın, onların ehtiyat hissələrinin və döyüş sursatlarının seriya ilə istehsalına başlanılmışdır. Nazirliyin yarandığı dövrlə müqayisədə müdafiə təyinatlı məmulatın istehsal həcmi 4 dəfə artmışdır. Ümumilikdə həmin dövr ərzində dünyanın ən qabaqcıl ölkələrindən 7 texnologiya və elmin son nailiyyətlərini özündə əks etdirən proqram təminatlı 62 avadanlıq alınmışdır. Həmin texnologiya və avadanlığın quraşdırılması, istismarı və yerli kadrların öyrədilməsi üçün inkişaf etmiş dövlətlərdən mütəxəssislər dəvət edilmişdir.

Cənab Prezident! Heç kimə sirr deyil ki, heç bir ölkə yaratdığı texnologiyaları hərbi maraqlarına zidd olduğundan digər dövlətlərə satmır. Bu texnologiyaların alınması şəxsən Sizin nüfuzunuz, həmin dövlətlərin başçıları ilə aranızda olan dostluq münasibətlərinin və Sizə olan diqqət və hörmət sayəsində baş tutmuşdur. Ona görə də kollektivimiz adından Sizə öz minnətdarlığımı bildirirəm.

2007-ci ildə müdafiə, xüsusi və mülki təyinatlı məmulatın istehsal həcmində 54,8 faiz artım əldə edilmişdir. Məhsulların çeşidi 280-nə çatmışdır. 52,7 min kvadratmetr sahədə tikinti və yenidənqurma işləri aparılmışdır.

Cənab Prezident! Bu sahənin müəssisələrində iş həcminin və əmək haqqının səviyyəsinin aşağı olması səbəbindən iş yerlərini tərk etmiş mütəxəssislər Müdafiə Sənayesi Nazirliyi yarandıqdan sonra yenidən geri qayıtmış və bunun nəticəsində işçilərin sayı 381 nəfər artmışdır. Orta aylıq əmək haqqı isə 188,6 manat olmuşdur.

Sizin 2007-ci il iyunun 22-də Ali Hərbi Məktəbin növbəti buraxılışına həsr edilmiş təntənəli mərasimdə Müdafiə Sənayesi Nazirliyinə verdiyiniz tapşırığınıza əsasən 2007-ci ilin sonunda “İqlim”, “Peyk” və Telemexanika zavodlarında yenidənqurma və bərpa işləri başa çatdırılmış və istehsal olunan müdafiə təyinatlı ilk məhsulun nümunələri Sizə təqdim edilmişdir.

2008-ci ilin Dövlət Müdafiə Sifarişi Proqramında 80 adda müdafiə təyinatlı məmulatın yaradılması, 444 adda məmulatın isə istehsalı nəzərdə tutulmuşdur.

Cari ildə müdafiə, xüsusi və mülki təyinatlı məmulatın istehsalı 42 faiz artımla nəzərdə tutulmuşdur. Cari ilin I rübündə məhsul istehsalının həcmi keçən ilin müvafiq dövrü ilə müqayisədə 35,4 faiz artmışdır. Yanvar-mart aylarında istehsal olunmuş məhsulların çeşidi ötən ilin müvafiq dövrü ilə müqayisədə 51 növ artaraq 213-ə çatdırılmışdır.

İşçilərin sayı 533 nəfər artmış və orta aylıq əmək haqqı isə 204,8 manat təşkil etmişdir. Bu da ötən ilin müvafiq dövrü ilə müqayisədə 27,1 faiz, nazirlik yaranan dövrdən isə orta hesabla 3 dəfə artım deməkdir.

2008-ci ildə dövlət büdcəsində Müdafiə Sənayesi Nazirliyi üçün 66 milyon 70 min manat vəsait nəzərdə tutulmuşdur. Bu vəsait hesabına 128 adda emal mərkəzi və dəzgahların alınması, habelə müdafiə təyinatlı məmulatın yaradılması planlaşdırılır. Eyni zamanda Proqrama uyğun olaraq müdafiə təyinatlı məmulatın seriya ilə istehsalına başlamaq üçün dünyanın inkişaf etmiş ölkələrindən müasir standartlara cavab verən 18 növ texnologiyanın alınması, onlar üçün istehsal sahəsinin yaradılmasına İnvestisiya Proqramı üzrə 159,0 mln manat vəsait tələb olunur. Müəssisələrdə yaradılacaq yeni istehsal sahələrinin hesabına 610 yeni iş yeri açılacaqdır. Bununla əlaqədar lazımi sənədlər hazırlanıb müvafiq nazirliklərə təqdim edilmişdir.

Bütün bunlar deməyə əsas verir ki, 2008-ci ilin Proqramında nəzərdə tutulan işlər I rübdə olduğu kimi il ərzində də müvəffəqiyyətlə yerinə yetiriləcəkdir.

Cənab Prezident!

Çıxışımın sonunda bildirmək istəyirəm ki, Müdafiə Sənayesi Nazirliyində qısa müddətdə əldə edilən uğurlar Sizin diqqət, qayğı və köməkliyiniz sayəsində olmuşdur.

Müdafiə Sənayesi Nazirliyinin kollektivi Sizin diqqət və qayğınızı daim hiss edir və Sizi əmin edir ki, Azərbaycanın müdafiə qüdrətinin möhkəmləndirilməsi istiqamətində qarşıya qoyulmuş vəzifələr uğurla həyata keçiriləcəkdir.

Diqqətinizə görə sağ olun.