“Müharibə uşaqların gözü ilə” mövzusunda inşa yazı müsabiqəsinin qalibləri mükafatlandırılıb
Bakı, 22 fevral, Həsrət Mahmudova, AZƏRTAC
Xocalı soyqırımının 24-cü ildönümü ilə əlaqədar Bakı Şəhər Gənclər və İdman Baş İdarəsinin, Gəncliyə Yardım Fondunun paytaxtın orta ümumtəhsil müəssisələrinin yuxarı sinif şagirdləri arasında “Müharibə uşaqların gözü ilə” mövzusunda təşkil etdiyi inşa yazı müsabiqəsinin qalibləri fevralın 22-də mükafatlandırılıb.
AZƏRTAC xəbər verir ki, tədbirdə əvvəlcə Xocalı soyqırımı qurbanlarının xatirəsi bir dəqiqəlik sükutla yad olunub, dövlət himni səsləndirilib, faciədən bəhs edən videoçarx göstərilib.
Baş İdarənin rəisi Raqif Abbasov mərasimdə çıxış edərək müsabiqənin məqsədinin Xocalı soyqırımı ilə bağlı həqiqətləri gənc nəsillərə çatdırmaq, gənclərimiz arasında milli vətənpərvərlik ruhunun təbliği olduğunu bildirib.
Prezident Administrasiyasının ictimai-siyasi məsələlər şöbəsinin məsul əməkdaşı Rasim Mirzəyev xalqımızın milli azadlıq və müstəqillik yolunda mübarizə tarixinin gənc nəsillərimiz tərəfindən dərindən öyrənilməsinin əhəmiyyətini qeyd edib, bu baxımdan belə tədbirlərin, müsabiqələrin vacibliyini diqqətə çatdırıb. Dövlətimizin başçısının gənclərə böyük ümidlər bəslədiyini diqqətə çatdıran R.Mirzəyev deyib: “Ulu öndərimiz Heydər Əliyev Azərbaycanın gələcəyinin gənclərimizdən asılı olacağını, habelə bayrağımızın daha da yüksəklərdə dalğalandırılacağını daim vurğulayırdı. Xalqımıza qarşı törədilən qırğınlar, soyqırımlar onun mübarizə əzmini nəinki qıra bilməmiş, əksinə, bizi daha da mətinləşdirib”.
Gənclər və İdman Nazirliyinin sektor müdiri Əli Məmmədov, Milli Məclisin deputatı Adil Əliyev, Türkiyənin Bakıdakı səfirliyinin mətbuat müşaviri Həmid Karadəniz, Gəncliyə Yardım Fondunun Himayəçilər Şurasının sədri Ahmet Tecim, “Xocalı Soyqırımının Tanıtma” İctimai Birliyinin sədri Şamil Sabiroğlu və digərləri çıxışlarında ermənilərin tarix boyu xalqımıza qarşı törətdikləri qanlı qırğınlardan və dəhşətli cinayətlərdən danışıblar. Bildirilib ki, 1992-ci il fevralın 25-dən 26-na keçən gecə Ermənistan silahlı qüvvələri beynəlxalq hüquq normalarını kobud şəkildə pozaraq dinc əhaliyə qarşı soyqırımı törədiblər. Həmin gün bir neçə saat ərzində 613 günahsız insan, o cümlədən 106 qadın, 63 uşaq və 70 qoca sırf azərbaycanlı olduqlarına görə xüsusi qəddarlıqla qətlə yetirilib, meyitlər üzərində təhqiredici hərəkətlərə yol verilib. Kütləvi qırğın nəticəsində 8 ailə tamamilə məhv edilib, 25 uşaq hər iki valideynindən, 130 uşaq isə valideynlərindən birini itirib, 487 dinc sakin ağır yaralanıb və 1275 nəfər girov götürülüb. Bundan başqa, 150 nəfərin taleyi indiyədək məlum deyil.
Çıxışlarda qeyd olunub ki, yalnız ümummilli lider Heydər Əliyevin hakimiyyətə qayıdışından sonra Xocalı faciəsinə siyasi-hüquqi qiymət verilib, soyqırımı haqqında həqiqətlərin beynəlxalq ictimaiyyətə çatdırılması üçün təsirli tədbirlər görülüb. Erməni millətçilərinin azərbaycanlılara qarşı törətdiyi cinayətlər, o cümlədən Xocalı qətliamının dünya ictimaiyyətinə çatdırılması, faciənin soyqırımı kimi tanınması üçün məqsədyönlü və ardıcıl fəaliyyət bu gün uğurlu bəhrəsini verməkdədir. Artıq dünyanın bir neçə dövləti, o cümlədən ABŞ-ın 20 ştatı bu faciəni soyqırımı kimi tanıyıb. Bu sahədə mühüm uğurların qazanılmasında Heydər Əliyev Fondunun da mühüm xidmətləri var.
Natiqlər, həmçinin tariximizin gənclər tərəfindən dərindən öyrənilməsinin, ölkəmizlə bağlı həqiqətlərin sosial şəbəkələrdə fəal təbliğ edilməsinin vacibliyini bildiriblər.
Çıxışlardan sonra inşa yazı müsabiqəsinin qalibləri mükafatlandırılıblar.
Bölmənin digər xəbərləri
