SİYASƏT
Murmansk vilayətində “Yeniyetmə miqrant” əməliyyatına yekun vurulmuşdur
Bakı, 2 noyabr (AZƏRTAC). Federal Miqrasiya Xidmətinin Zapolyarye (Kola yarımadası) regional idarəsi “Yeniyetmə miqrant” adlı ixtisaslaşdırılmış sosial-profilaktik əməliyyat aparmışdır.
Qeyd edək ki, əməliyyat Rusiya DİN-in Murmansk vilayəti üzrə İdarəsinin ərazi bölmələri, yetkinlik yaşına çatmayanların işləri və onların hüquqlarının müdafiə olunması üzrə bələdiyyə komissiyaları ilə birlikdə keçirilmişdir.
Məqsəd əcnəbi vətəndaşların uşaqlarının təhsil və tibbi xidmət almaq hüquqlarının təmin olunması, onlar barəsində ayrı-seçkiliyə yol verilməməsi üçün zəruri şərait yaratmaqdır.
Əsas diqqət yetkinlik yaşına çatmayan uşaqları olan əcnəbi vətəndaşların ailələrinə hüquqi və sosial yardım göstərilməsi məsələlərinə yönəldilmişdir. Belə yardım 36 əcnəbi vətəndaş ailəsinə göstərilmişdir.
Qeyd edək ki, yetkinlik yaşına çatmayanların işləri və onların hüquqlarının müdafiəsi üzrə bələdiyyə komissiyalarına belə uşaqların təhsil müəssisələrinə qəbul olunmaları üçün məlumat göndərilmişdir.
Bundan əlavə, əməliyyat zamanı RF-nin miqrasiya qanunvericiliyini pozan 20 yeniyetmə aşkar edilmiş, RF-nin İnzibati Xətalar Məcəlləsinin 18.9 maddəsi ilə müəyyən edilmiş əcnəbi vətəndaşların və RF vətəndaşlığı olmayan şəxslərin ölkədə yaşaması qaydalarının pozulmasına yol verən 19 vətəndaş inzibati məsuliyyətə cəlb olunmuşdur.