Murmanskda şəhərin yaranması günü bayram edilir
Bakı, 4 oktyabr (AZƏRTAC). Bu gün Murmanskın 96 yaşı tamam olur. Murmansk dünyada şimal qütb dairəsində yerləşən ən böyük şəhəridir.
Şəhər Barents dənizinin Kola körfəzinin şərq sahilində yerləşir, Murmansk vilayətinin mərkəzidir.
1915-ci ildə Kola körfəzinin sahilində dəniz limanı salınmışdır. Şəhərin yaranmasının rəsmi tarixi 1916-cı il 4 oktyabrdır. Bu, Rusiya imperiyasında salınmış son şəhər idi, ona Romanov-Murman adı verilmişdi.
Böyük Vətən müharibəsi dövründə xeyli dağıdılmış bu şəhər 1950-ci ilin əvvəllərində bərpa edilmişdir. Müharibədən sonrakı illərdə Murmansk xeyli böyümüş, qütbarxası dairədə Rusiyanın ən böyük limanına çevrilmişdir.
Şəhərin başlıca əlamətdar yerləri hərbi şöhrət qazanmış yerlərdir, onların sırasında Sovet Zapolyaryesinin müdafiəçilərinə və dinc dövrdə həlak olmuş dənizçilərə qoyulmuş abidə də vardır. “Murmansklı Alyoşa” Rusiyada ən böyük abidələrdən biridir.
Semyonovskoye gölünə gedib baxmağa dəyər. Gölün ortasında fəvvarə və dünyanın ən şimal okeanariumu vardır.
Şəhərdə təqribən 315 min adam yaşayır. Qeyri-rəsmi məlumata görə, bu şəhərdə 15 min nəfərə yaxın həmvətənimiz yaşayıb işləyir.
Şəhər Günü bayramı münasibətilə Murmansk administrasiyasının başçısı Andrey Sısoyevin və Murmansk bələdiyyə qurumunun başçısı Aleksey Vellerin adına Azərbaycan Respublikasının rəsmi şəxslərindən məktub və teleqramlar daxil olur. Onlardan birini də Azərbaycanın Rusiyadakı səfiri Polad Bülbüloğlu imzalamışdır. Azərbaycanın Rusiyadakı səfirinin məktubunda deyilir: “Fürsətdən istifadə edərək Azərbaycan diasporu nümayəndələrinin fəaliyyətinə verdiyiniz əvəzolunmaz dəstəyə görə sizə səmimi minnətdarlığımı bildirmək istəyirəm. Bu dəstək, şübhəsiz, Rusiya Federasiyası ilə Azərbaycan arasında hərtərəfli əlaqələrin daha da möhkəmlənməsinə və inkişafına kömək göstərir. Sizə olan dərin ehtiramımı qəbul edin”.
Bölmənin digər xəbərləri
