Murmanskda Xocalı faciəsinin 21-ci ildönümü ilə əlaqədar anım tədbiri keçirilmişdir
Bakı, 27 fevral (AZƏRTAC). Ümumrusiya Azərbaycan Konqresinin (ÜAK) Murmansk vilayət bölməsi və Rusiyanın Azərbaycanlı Gənclər Birliyinin (RAGB) yerli bölməsi Xocalı soyqırımının 21-ci ildönümü ilə əlaqədar matəm tədbiri keçirmişlər. Tədbirdə Azərbaycan icmasının və digər milli icmaların, yerli ictimaiyyətin nümayəndələri iştirak etmişlər.
ÜAK-ın Murmansk vilayət bölməsinin sədri, regionun İctimai Palatasının üzvü Afil Hüseynov tədbirdə çıxış edərək bildirmişdir ki, Qarabağ şəhəri Xocalı son aylar özünün yeni aeroportu ilə tanınır. Bu hava limanını qondarma subyektin hakimiyyət orqanları beynəlxalq qanunvericiliyin tələblərinə məhəl qoymadan açmağa çalışırlar. Lakin Qarabağ müharibəsinin ən amansız və qanlı epizodlarından biri bu şəhərlə bağlıdır. 1992-ci il fevralın 26-na keçən gecə şəhərə hücuma keçən erməni silahlı qüvvələri qaçıb canlarını qurtarmaq istəyən dinc sakinlərin başına olmazın müsibətlər gətirmişdir. Ümumən 613 adam minaatanlardan, odlu silahlardan açılan atəşlə, qaçmağa cəhd edərkən qətlə yetirilmiş, donaraq ölmüş, 500-dək adam, o cümlədən onlarca uşaq və qadın yaralanmış, 1275 adam girov götürülmüşdür. O günlər Rusiya və Qərb KİV-ləri faciənin miqyasından dəhşətə gəlmiş, “Human Right Watch” beynəlxalq hüquq müdafiə təşkilatı Xocalı faciəsini “Qarabağ münaqişəsi zamanı ən böyük qətliam” adlandırmışdır.
“Memorial” cəmiyyətinin Xocalı cinayətinin isti izləri ilə apardığı araşdırma o günlərin hadisələrindən, məsələn, 1991-ci ilin ikinci yarısında və 1992-ci ilin əvvəlində Qarabağ müharibəsinin xarakterindən ətraflı söz açır. Təşkilatın saytında müvafiq hesabat vardır və bu sənəd təbliğat xarakterli sonrakı fikirlərdən xeyli dərəcədə təmizlənmişdir.
Murmansk vilayəti hökuməti yanında ailə və uşaqların maraqları ilə bağlı regional proqramların həyata keçirilməsi üzrə Ekspert-Əlaqələndirmə Şurasının üzvü, İctimai Palatanın üzvü Rita Abdurahmanova, Moldova Mədəniyyət Mərkəzinin sədri Oksana Mogilina, “Asiya” Murmansk vilayət təşkilatının sədri Fəridə Nəsirova, ÜAK-ın Murmansk vilayət bölməsi idarə heyətinin üzvü Amil Vəliyev, RAGB-ın fəalları Səbinə Əliyeva, Rəşad Əliyev və başqaları tədbirdə çıxış edərək vurğulamışlar ki, ATƏT-in Minsk qrupunun vasitəçilik missiyası atəşkəs müqaviləsinin imzalandığı gündən keçən təxminən 20 il ərzində heç bir uğur gətirməmişdir.
Murmansk vilayəti qubernatoru yanında Məsləhət Şurasının üzvü, Azərbaycan və Rusiyanın jurnalistlər ittifaqlarının üzvü Əlihüseyn Şükürov AZƏRTAC-a məlumat vermişdir ki, bu günlər Murmanskda Xocalı soyqırımına həsr olunmuş fotosərgi təşkil edilmiş, “Qarabağ haqqında həqiqət” seriyasından kitablar və Ermənistanın Azərbaycan xalqına qarşı təcavüzü tarixindən söz açan digər nəşrlər təqdim olunmuşdur.
Ekspozisiyada məşhur fotojurnalistlərin 100-dən çox əsəri təqdim olunmuşdur. Murmansklılar Qarabağ münaqişəsi, onun ölkəmiz üçün ağrılı nəticələri haqqında nəşrlər, disklər, qəzet və jurnal məqalələri, “Qarabağ gerçəklikləri” seriyasından kitablar, Mirkazım Seyidovun “Azərbaycan”, “Şuşa. Qrafika”, “Çiçək və işıq” fotoalbomları, Yuri Pompeyevin “Qarabağ gündəliyi”, Elmira Axundovanın “Şəxsiyyət və zaman” kitabları ilə tanış olmuşlar.
Bölmənin digər xəbərləri
