AZƏRTAC-ın Moskvadakı müxbiri xəbər verir ki, fevralın 23-də Kremldə Rusiya, Belarus, Ukrayna və Qazaxıstan arasında vahid iqtisadi məkan yaradılmasının zəruriliyi haqqında birgə bəyanat imzalanmışdır. Rusiya Federasiyasının Prezidenti Vladimir Putinin, Belarus Prezidenti Aleksandr Lukaşenkonun, Ukrayna Prezidenti Leonid Kuçmanın və Qazaxıstan Prezidenti Nursultan Nazarbayevin imzaladıqları bu sənəd sentyabrda dörd dövlət arasında vahid iqtisadi məkan yaradılması haqqında tammiqyaslı saziş imzalanması üçün təməl olmuşdur. Sənəddə deyilir ki, dörd ölkə arasında iqtisadi inteqrasiyanın və bu ideyanın həyata keçirilməsi tədbirlərinə dair danışıqların yeni mərhələsi başlanır. Gələcək tammiqyaslı sənəddə yeni iqtisadi məkan üçün hüquqi baza yaradılması, bir sıra istiqamətlərdə razılaşdırılmış iqtisadi siyasət yeridilməsi, müvafiq qanunvericiliyin uyğunlaşdırılması, ticarət və tariflər üzrə vahid tənzimləyici dövlətlərarası komissiyanın təşkili nəzərdə tutulmuşdur. Son məqsəd Regional İnteqrasiya Təşkilatının yaradılmasıdır. 

Rusiya ekspertləri hesab edirlər ki, bu dörd dövlətin gələcəkdə vahid valyuta məkanına keçməsi, yəni vahid rubl zonası yaratması istisna olunmur. Rusiya, Belarus, Qazaxıstan, Tacikistan və Qırğızıstanın daxil olduqları Avrasiya İqtisadi Əməkdaşlıq Zonasının bu yaxınlarda keçirilmiş iclasında vahid valyuta zonası yaradılmasının mümkünlüyü barədə söhbət getmişdir.

Azərbaycan bu cür qurumlara daxil deyildir. Respublikamız Birlik dövlətləri ilə və onların hər biri ilə ikitərəfli qaydada ticarət-iqtisadi əməkdaşlığı inkişaf etdirməklə kifayətlənir.

Asya Hacızadə

AZƏRTAC-ın xüsusi müxbiri

Moskva