MÜSTƏQİL RESPUBLİKAMIZ HEYDƏR ƏLİYEV YOLU İLƏ ƏZMLƏ, BÖYÜK UĞURLA VƏ SARSILMAZ İNAMLA ADDIMLAYIR
Kollecin direktoru, YAP Siyasi Şurasının üzvü, professor Nurlana Əliyeva AZƏRTAC-ın müxbirinə demişdir ki, bütün tədbirlərimizin ana xəttini bu fikir təşkil edir ki, Azərbaycanın müstəqilliyinin qorunub saxlanılması, daimi və əbədi olması xalqımızın ümummilli lideri Heydər Əliyevin qətiyyəti, uzaqgörən siyasəti nəticəsində mümkün olmuşdur. Məhz bunların sayəsində müstəqil Azərbaycan dünya siyasətinin reallığıdır. Bayrağımız bayraqlar sırasında vüqarla dalğalanır. Bu, Heydər Əliyevin, müdrik rəhbərin doğma xalqına yarıməsrlik xidmətinin ən yüksək nümunəsi, xalqımızın ən böyük qoruyucu və irəliaparıcı dəyəridir.
Artıq hamımızın qəti qənaətidir ki, öz suverenliyinə nail olmuş xalq xoşbəxtdir. Azərbaycan xalqı da belə xoşbəxtlərdəndir. Müdriklərdən biri deyib ki, azadlığın qədrini yalnız onun uğrunda ölməyi bacaranlar bilər. Xalqımız sübut etdi ki, azadlıq uğrunda qurban verməyə hazırdır. Tələbələrimiz bu faktı yaxşı bilirlər. Onlar ölkəmizin bütün guşələrində şəhidlər xiyabanlarının mövcudluğundan da xəbərdardırlar. Ona görə də təlim, təhsil və tərbiyədə qazandıqları uğurları azadlığımız və müstəqilliyimiz uğrunda həlak olmuş şəhidlərimizin xatirəsinə ən böyük ehtiram əlaməti hesab edirlər. Onların bu səyi, elmlərin əsaslarına mükəmməl yiyələnmək cəhdi ölkəmizin gələcəyinin etibarlı əllərdə olduğunu deməyə əsas verir. Bu gün Azərbaycan gəncliyi haqlı olaraq Azərbaycanın müstəqilliyini, bu müstəqilliyin sarsılmazlığını və dönməzliyini özünə layiqli töhfə sayır. Çünki yaxşı bilir: müstəqilliyin əldə olunması nə qədər çətin olsa da, onun qorunub saxlanması, möhkəmləndirilməsi bundan qat-qat çətindir. Bu vəzifə ümummilli liderimiz Heydər Əliyevin müdrikliyi sayəsində yerinə yetirilib. Pedaqoji kollektivimiz çalışır ki, tələbələrimiz müstəqilliyin qədrini bilsinlər, onlarda “mənim dövlətim” fikri formalaşsın, o, bu dövləti qorumağa hazır olsun.
Dövlət Müstəqilliyi günü bir daha böhranlı illəri xatırlayır, bizi bu böhrandan çıxarmış dahi insanın - Heydər Əliyevin xatirəsini ehtiramla yad edirik. Allah ona rəhmət eləsin, ruhu şad olsun. Qəlbimizdə əbədi yer tutmuş bu dahi şəxsiyyət həm də yaratdığı dövlətimizin timsalında yaşayır və yaşayacaqdır. Bu dövlətin sükanı etibarlı əllərdədir. Heydər Əliyev siyasət və diplomatiya məktəbini keçmiş cənab İlham Əliyev müstəqil respublikamızı əzmlə, böyük uğurla və sarsılmaz inamla Heydər Əliyev yolu ilə irəli aparır. “Əsrin müqaviləsi”ni və Heydər Əliyevin memarı olduğu digər milli yüksəliş layihələrini bu gün uğurla həyata keçirən dövlətimizin başçısı İlham Əliyev Azərbaycan vətəndaşlarında nikbinlik hissi yaratmış, bir çox siyasi, sosial-iqtisadi və mənəvi mahiyyət daşıyan problemlərin tezliklə həll olunacağına bəslənilən ümidləri artırmışdır. Daxili və xarici siyasətdə, iqtisadiyyatda, təhsil və səhiyyədə, bir sözlə, həyatımızın bütün sahələrində qazanılan uğurlar bu ümidləri daha da möhkəmlədir. Xalqımız, xüsusilə gənclərimiz gələcəyə inanır. İnam isə qələbənin yarısıdır, deyiblər.
Bölmənin digər xəbərləri
